സഞ്ചാര കാഴ്ചകള്‍

ഹോങ്കോങ് / ചൈനാ യാത്ര- 3

2012-01-28T07:24:00.000-08:00

ഹോങ്കോങ്ങിലെ ഹങ്-ഹോം റെയില്‍ വേ സ്റ്റേഷനില്‍,ചൈനക്കുള്ള ഇന്റര്‍ സിറ്റി ട്രെയിനും പ്രതീക്ഷിച്ച്, ഒരു നീണ്ട ക്യൂവിലാണു ഞങ്ങളിപ്പോള്‍.ചൈനയിലെ ഗോങ്ങ് ചോ നഗരത്തിലേക്കാണു യാത്ര. ഇരുന്നൂറു കിലോമീറ്ററോളം ദൂരെയുള്ള ഗോങ്ങ് ചോ നഗരത്തില്‍ ഏകദേശം രണ്ട് മണിക്കൂര്‍ സമയം കൊണ്ട് എത്താനാകും.ഓണ്‍ലൈന്‍ ടിക്കറ്റ് ബുക്കിങ് നടത്തിയിരുന്നത് കൊണ്ട് ടിക്കറ്റ് വാങ്ങുവാനുള്ള പൊല്ലാപ്പ് ഒഴിവായി. സമയം നാലു മണിയോടടുക്കുന്നു.കൌണ്ടര്‍ ഇനിയും തുറന്നിട്ടില്ല.ട്രെയിന്‍ പുറപ്പെടുവാന്‍ അര മണിക്കൂറേയുള്ളു.ക്യൂവിനാകട്ടെ നിമിഷം പ്രതി നീളം വര്‍ദ്ധിച്ചും വരുന്നു.ഈ യാത്രയിലാദ്യമായി ഒരു ടെന്‍ഷന്‍ ഉടലെടുത്തു.സമയത്ത് അകത്ത് കയറാനാകുമോ എന്തോ.

ഹങ്ഹോം സ്റ്റേഷന്‍

നാലു മണി കഴിഞ്ഞതും ഒരു ഉദ്യോഗസ്ഥന്‍ വന്ന് കൌണ്ടറിനു കുറുകെയിട്ടിരുന്ന നാട മാറ്റി,തുടര്‍ന്ന് സ്കാനിങ് മെഷീന്‍ ഓണ്‍ ചെയ്തു. ആശ്വാസം,പരിപാടി തുടങ്ങുകയായി. ക്യൂ മെല്ലെ ചലിച്ചു തുടങ്ങി. മുന്നില്‍ ഏറിയ ആളുകളും ചൈനീസ് വംശജരാണു.ഒരു പത്തിരുപത് കറുത്ത വര്‍ഗ്ഗക്കാരുമുണ്ട്.കുറച്ച് കഴിഞ്ഞപ്പോള്‍ ക്യൂവിന്റെ ചലനം നിലച്ചു, എന്തോ വാഗ്വാദം നടക്കുകയാണു.ലഗേജിന്റെ സൈസിനെക്കുറിച്ചുള്ള തര്‍ക്കമാണു ഉദ്യോഗ്സഥരും,കറുത്തവര്‍ഗ്ഗക്കാരനും തമ്മില്‍. വലിയ സൈസിനു അധികകാശ് ഒടുക്കണം.അവസാനം അയാള്‍ ക്യൂവിനു പുറത്ത് പോയി,പ്രശ്നവും തീര്‍ന്നു.ചൈനീസ് വംശജര്‍ക്കു തങ്ങളുടെ കാര്‍ഡ് കാണിച്ച് അകത്തു പ്രവേശിക്കാമെന്നുള്ളതു കൊണ്ട് ക്യൂ വേഗം മുന്നോട്ട് നീങ്ങി.കാര്യമായ പരിശോധനയൊന്നുമില്ലാതെ ഞങ്ങളും പാസ്പോര്‍ട്ട് പതിച്ചെടുത്തു അകത്തു കടന്നു.
ആവര്‍ത്തിക്കുന്നതില്‍ ക്ഷമിക്കണം,വിമാനത്താവളത്തിന്റെ സൌകര്യങ്ങളുള്ള സ്റ്റേഷന്‍ ആണിത്. ഇന്ത്യയില്‍ നിന്നും വരുന്ന നമ്മള്‍ക്ക് ചിന്തിക്കാവുന്നതിനപ്പുറം.നിര നിരയായി,പൂര്‍ണ്ണമായും എയര്‍ കണ്ടീഷന്‍ ചെയ്ത, ഡിപാര്‍ച്ചര്‍ ലോഞ്ചുകള്‍. ഫുഡ് ജോയന്റുകളും,സ്നാക്സ് പാര്‍ലറുകളുമെല്ലാം ധാരാളമായുണ്ട്.മറ്റുകടകളും യഥേഷ്ടം.

ഭൂ നിരപ്പിനു താഴെയാണു പ്ലാറ്റ്ഫോം.നാലര മണിയായപ്പോള്‍ എസ്കലേറ്റര്‍ ചലിച്ചുതുടങ്ങി.ഞങ്ങള്‍ പ്ലാറ്റ്ഫോമിലെത്തി.ട്രെയിന്‍ തയ്യാറായി കിടക്കുന്നു.പക്ഷെ യാത്ര പുറപ്പെട്ടത് ,നമ്മുടെ ട്രെയിനുകളെപ്പോലെ തന്നെ, അല്പം താമസിച്ച്,നാലേ മുക്കാലോടെ മാത്രമാണു. ടിക്കറ്റ് നോക്കി ട്രെയിനകത്ത് പ്രവേശിച്ചു.നല്ല വൃത്തിയും വെടിപ്പുമുള്ള കമ്പാര്‍ട്ട്മെന്റ്.

സുഖപ്രദമായ സീറ്റുകളും.സീറ്റ് തേടിപ്പിടിച്ച് ഇരുന്നപ്പോഴേക്കും ഹോസ്റ്റസ്സ് എത്തി റ്റിക്കറ്റ് പരിശോധിച്ച ശേഷം ടിക്കറ്റിനോടൊപ്പമുള്ള ബിസ്കറ്റും വെള്ളക്കുപ്പികളും നല്‍കി.സീറ്റുകള്‍ മുഴുവനായും നിറഞ്ഞിരിക്കുന്നു.ട്രെയിന്‍ നീങ്ങിത്തുടങ്ങി.ഇരുവശത്തും നഗരക്കാഴ്ചകള്‍.ചില സ്ഥലങ്ങളില്‍ വലിയ ഇരുമ്പ് ഷീറ്റ് ഉയോഗിച്ച് ട്രാക്കിനിരുവശവും ദീര്‍ഘദൂരം മറച്ചിരിക്കുന്നു.

ചൈനീസ് ഗ്രാമക്കാഴ്ചകള്‍

സീറ്റുകളിലെല്ലാം യാത്രക്കാര്‍ നിറഞ്ഞിരിക്കുന്നു.അംബരചുംബികള്‍ തിങ്ങി നില്‍ക്കുന്ന നഗര ഭാഗങ്ങള്‍ പിന്നിട്ട് തുടങ്ങി.സാവധാനമാണു യാത്ര.കുറച്ച് കഴിഞ്ഞപ്പോള്‍ ഗ്രാമക്കാഴ്ചകള്‍ കണ്ടു തുടങ്ങി.ചൈനയായിരിക്കുന്നു.

ചെറിയചെറിയചൈനീസ്ഗ്രാമങ്ങള്‍,കൃഷിജോലികളിലേര്‍പ്പെട്ടിരിക്കുന്ന ഗ്രാമീണര്‍.വിശലമായ നെല്‍പ്പാടങ്ങളും ചെറു ഡാമുകളും ഇരു വശത്തും കാണാം.ആറുമണിയോടെ ഷെന്‍ജന്‍ എന്ന വ്യാവസായിക നഗരത്തിലെത്തി.

ഷെന്‍ജന്‍ നഗരം

വലിയ കെട്ടിടങ്ങളുടെ നീണ്ട നിരതന്നെ എല്ലായിടത്തും. ഷെന്‍ജന്‍ പിന്നിട്ടതും ട്രെയിന്‍ നല്ല വേഗതയിലായി.പുറത്ത് ഇരുട്ടു വീണുതുടങ്ങി.യാത്രക്കാര്‍ എല്ലാവരും തന്നെ ഉറക്കത്തിലാണു.ഏഴുമണിയോടെ ഗോങ്-ചോ ഈസ്റ്റ് സ്റ്റേഷനെത്തി.ലഗേജുമെടുത്ത് ,ഇമിഗ്രേഷന്‍ നടപടികളും പൂര്‍ത്തിയാക്കിപുറത്തിറങ്ങി.ടാക്സികള്‍ വട്ടമിട്ടു കഴിഞ്ഞു, ചൈനയിലെ ഏറ്റവും വലിയ പ്രശ്നമായി എനിക്കനുഭവപ്പെട്ടത് ഭാഷ തന്നെയാണു.ഇംഗ് ളീഷ് അറിയാവുന്നവരെ അധികം കാണുവാന്‍ സാധിച്ചതേയില്ല. കൈമുദ്രകളിലൂടെയാണു ആശയവിനിമയം.അവസാനം മുറി ഇംഗ്ലീഷ് അറിയാവുന്ന ഒരാളുടെ ടാക്സിയില്‍ കയറിപ്പറ്റി.നഗര ഹൃദയത്തിലുള്ള മജെസ്റ്റിക് എന്ന ഹോട്ടലില്‍ ,തലേ ദിവസം ,ടെലഫോണിലൂടെ,റൂം ബുക്ക് ചെയ്തിട്ടുണ്ട്. (നേരത്തേ നെറ്റ് വഴി ബുക്ക് ചെയ്യുവാന്‍ ശ്രമിച്ചപ്പോള്‍ അവര്‍ ക്രെഡിറ്റ് കാര്‍ഡിന്റെ സ്കാന്‍ഡ് ഫോട്ടോ ആവശ്യപ്പെട്ടിരുന്നു .എന്തോ ഒരു പന്തികേട് തോന്നിയത് കൊണ്ട് ചെയ്തില്ല.) നഗരത്തിരക്കിലൂടെ ടാക്സി ഹോട്ടലിലെത്തി,ഞങ്ങളെ അവിടെയിറക്കി,മടങ്ങി.റിസപ്ഷനിലെത്തിയപ്പോള്‍, പച്ച മലയാളത്തില്‍ പറഞ്ഞാല്‍, “കളി കിട്ടി“ റിസര്‍വേഷന്‍ ഇല്ല! മുറികള്‍ ഒഴിവുമില്ല!!ഫോണിനു ചൈനീസ് സിംകാര്‍ഡുമില്ല!!!നേരത്തെ നെറ്റില്‍ ബുക്ക് ചെയ്യുവാന്‍ ശ്രമിച്ചതും,ആ അഡ്രസ്സിലുള്ള ഫോണില്‍ സംസാരിച്ചു ബുക്ക് ചെയ്തതും,വ്യാജ സൈറ്റില്‍ ആയിരുന്നു!ആ തട്ടിപ്പിനിരയാവാതെ കഷ്ടിച്ച് രക്ഷപെട്ടു.
അവസാനം ഇംഗ്ലീഷ് അറിയാവുന്ന റിസപ്ഷനിസ്റ്റിന്റെ ദയാവായ്പില്‍ എഴുപത് കി.മി.ദൂരെയുള്ള സുഹൃത്തിനു ഫോണ്‍ ചെയ്ത്,ആളുടെ പരിചയത്തിലുള്ള കാര്‍ വരാനുള്ള ഏര്‍പ്പാട് ചെയ്തു.ആ കാര്‍ ഗോങ്-ചോ നഗരത്തില്‍ തന്നെ താമസിക്കുന്ന യോങ് എന്ന ചൈനാക്കാരന്റേതാണു. കഴിഞ്ഞ ചൈനാ യാത്രയിലും യോങ്ങായിരുന്നു ഞങ്ങളുടെ സാരഥി. ഒന്‍പതര മണിയോടെ യോങ് എത്തി.സൌഹൃദം പുതുക്കി,ഒരു സിംകാര്‍ഡും വാങ്ങി, കാറില്‍ക്കയറി അടുത്ത ഹോട്ടല്‍തേടി പുറപ്പെട്ടു.പത്തര മണിയോടെ പേള്‍ നദിക്കരയിലുള്ള നല്ലൊരു ഹോട്ടലില്‍ മുറിതരപ്പെടുത്തി തന്നു,പിറ്റേന്ന് രാവിലെ കാണാമെന്ന ഉറപ്പില്‍ യോങ് യാത്ര പറഞ്ഞു.നല്ല വിശപ്പ്, ഉച്ചഭക്ഷണത്തിനു ശേഷം കാര്യമായിട്ടൊന്നും കഴിച്ചിട്ടില്ല താനും.ഹോട്ടലിലെ റെസ്റ്റോറണ്ട് അടച്ചിട്ടില്ല.അവിടെ നിന്നും ഭക്ഷണത്തിനു ശേഷം തെരുവിലേക്കിറങ്ങി, തെരുവീഥികള്‍ ഇപ്പോഴും സജീവമാണു.ഹോട്ടലിനെതിര്‍വശത്തുള്ള നൈറ്റ്ക്ലബ്ബില്‍ സംഗീതത്തിന്റെ പ്രകമ്പനം,ചൈനീസ് യുവത്വം ആഘോഷതിമിര്‍പ്പിലാണു.അതുനേരം വെളുക്കുവോളം നീണ്ടുനില്‍ക്കുമത്രേ.

രാത്രിയിലും സജീവമായ തെരുവുകള്‍

മുന്നില്‍ പേള്‍നദിയോടു ചേര്‍ന്നുള്ള നടപ്പാതയില്‍,സുഖകരമായ കാലാവസ്ഥയായതുകൊണ്ടാവാം, ഈ സമയത്തും നിറയെ ആളുകള്‍.ഇളം തണുപ്പിലൂടെ ,നദിയോരത്തുകൂടി കുറേദൂരം നടന്നു.പേള്‍ നദിയിലെ അലങ്കാരദീപങ്ങളെല്ലാം കണ്ണടച്ചിരിക്കുന്നു.വലിയ കെട്ടിടങ്ങളില്‍നിന്നുമുള്ള ഫ്ലാഷ് ലൈറ്റുകള്‍ മാത്രം ഇടക്കിടെ തെളിയുന്നുണ്ട് . പോലീസ് വാഹനങ്ങള്‍ റോന്ത് ചുറ്റുന്നത് കാണാം.തിരികെ ഹോട്ടലിലെത്തുമ്പോള്‍ സമയം അര്‍ദ്ധരാത്രി കഴിഞ്ഞു.യോങ് രാവിലെ തന്നെ കാറുമായി എത്താമെന്നേറ്റിട്ടുണ്ട്.നാളെ കാണേണ്ട കാഴ്ചകളെക്കുറിച്ച് രാവിലെ ഒരു പട്ടിക തയ്യാറാക്കണം.അതിനു മുന്‍പു നല്ലൊരുറക്കം ...

പിറ്റേന്ന് രാവിലെ പത്തര മണിയോടെ ഹോട്ടലില്‍ ബ്രേക് ഫാസ്റ്റ് കഴിഞ്ഞപ്പോഴേക്കും യോങ് എത്തി.സമയ ക്ലിപ്തതയുടെ കാര്യത്തില്‍ കണിശക്കാരനാണു യോങ് എന്ന് കഴിഞ്ഞ ചൈന യാത്രയില്‍ തന്നെ ബോധ്യമായിരുന്നതാണു.പക്ഷെ ഇംഗ്ലീഷ് ഭാഷ സ്വാഹ!ആള്‍ക്ക് ആകെ അറിയാവുന്ന ഐറ്റം”ഐ ഡോണ്ട് നോ” എന്നത് മാത്രമാണു.പിന്നീടങ്ങോടുള്ള ദിവസങ്ങളില്‍ ഈ ”ഐ ഡോണ്ട് നോ”ഒരുപാടു തവണ ചിരിക്കു വകയൊരുക്കി എന്നത് മറ്റൊരു കാര്യം. തലേന്ന് റെയില്‍ വേ സ്റ്റേഷനില്‍ നിന്നും കിട്ടിയിരുന്ന ചൈനീസ് ഭാഷയിലുള്ള മാപ്പില്‍ നിന്നും കാണേണ്ട കാഴ്ചകളൊക്കെ ഹോട്ടല്‍ റിസപ് ഷനിസ്റ്റിനെക്കൊണ്ട് മാര്‍ക്ക് ചെയ്തെടുത്ത് യോങിനു കൈമാറി.ലിസ്റ്റിലെ ആദ്യ ഇനം ടെമ്പിള്‍ ഓഫ് സിക്സ് ബന്യന്‍ ട്രീസ് എന്ന വിഖ്യാതമായ ബുദ്ധക്ഷേത്രമാണു. 1400 വര്‍ഷം പഴക്കമുള്ള ഈ ക്ഷേത്രം പലതവണ പുതുക്കിപണിതതാണത്രേ.ഒന്‍പത് നിലകളിലായുള്ള,ഒക്റ്റഗണല്‍ ഷേയ്പ്പിലുള്ള, ലോട്ടസ് പഗോഡയാണു ഇവിടത്തെ മുഖ്യ ആകര്‍ഷണം.

ടെമ്പിള്‍ ഓഫ് സിക്സ് ബന്യന്‍ ട്രീസ്

വിശുദ്ധ ബുദ്ധസന്യാസി ശാക്യമുനിയെ ആരാധിക്കുവാനായി നിര്‍മ്മിച്ചതാണിത്.ചൈനീസ് ക്ഷേത്രങ്ങളിലെ ആരാധനാമൂര്‍ത്തികളുടെ പേരുകളിലെ ഇന്ത്യന്‍ സാദൃശ്യം നമ്മുടെ പ്രത്യേക ശ്രദ്ധയാകര്‍ഷിക്കും. ശാക്യ മുനി,ദേവരാജന്‍,മഹാവീരന്‍ തുടങ്ങിയവ അവയില്‍ ചിലത് മാത്രം.പലരൂപത്തിലുള്ള ബുദ്ധവിഗ്രഹങ്ങള്‍ ഈ ക്ഷേത്രത്തില്‍ പ്രതിഷ്ടിച്ചിരിക്കുന്നു.സന്ദര്‍ശകരില്‍ പാശ്ചാത്യരാണധികവും,ഇന്ത്യാക്കാര്‍ ഞങ്ങള്‍ മാത്രം.മറ്റു പല സ്ഥലങ്ങളിലും ഇത് തന്നെയായിരുന്നു സ്ഥിതി.കുറച്ച് ചിത്രങ്ങളെടുത്ത ശേഷം ഞങ്ങള്‍ അടുത്ത ലക്ഷ്യമായ ഗോങ്സിയാവൊ ക്ഷേത്രത്തിലേക്ക് നീങ്ങി.200 ബിസി യില്‍ നിര്‍മ്മാണം ആരംഭിച്ചതെന്ന് കരുതപ്പെടുന്ന ഈ ക്ഷേത്രമാണു ഗോങ്-ചോ നഗരത്തിന്റെ പിറവിക്കു നിദാനമെന്ന് കന്റോണീസ് സംസ്കാരത്തില്‍ വിശ്വസിച്ച് വരുന്നു.

ഗോങ്സിയാവൊ ക്ഷേത്രം

ഗോങ്സിയാവൊ ക്ഷേത്രം
വളരെ വിശാലമായ സ്ഥലത്ത് സ്ഥിതി ചെയ്യുന്ന ഇവിടെ ഹോള്‍ ഓഫ് സ്ലീപിങ് ബുദ്ധ ആണു പ്രധാന കാഴ്ച. കൂടാതെ ശാക്യമുനിയുടേയും, മഞ്ജുശ്രീയുടേയും,വിശ്വഭദ്ര ബോധിസത്വന്റേയും വിഗ്രഹങ്ങള്‍ കാണാം.ഈ ക്ഷേത്രത്തില്‍ തദ്ദേശീയരെയാണു കൂടുതലായും കാണുവാന്‍ കഴിഞ്ഞത്. സോവനീര്‍ ഷോപ്പുകളും ഇതിനകത്തുണ്ട്.വിദേശ ടൂറിസ്റ്റുകളുടെ അഭാവം കൊണ്ടാകാം, വളരെ ന്യായമായ വിലയില്‍ ആണു ഇവിടെ മിക്കവാറും മെമെന്റോകളും വില്‍ക്കുന്നത്.ആ അവസരം മുതലാക്കി ഞങ്ങളും അല്ലറ ചില്ലറ ഷോപ്പിംഗ് നടത്തി.

നേരം ഉച്ചയായി,വിശപ്പും ആക്രമിച്ചും തുടങ്ങി.ഒരു ഹോട്ടലില്‍ പോകണം എന്ന് യോങിനോട് ആംഗ്യ ഭാഷയിലൂടെ ഒരു വിധം പറഞ്ഞൊപ്പിച്ചു.ഹാവൂ, ആശ്വാസം!! ആള്‍ക്കു കാര്യം പിടികിട്ടി.യോങ് പേള്‍നദീ തീരത്ത് തന്നെയുള്ള വലിയൊരു റെസ്റ്റോറന്റിലേക്ക് ഞങ്ങളെ ആനയിച്ചു!!ഹോങ്സിങ് സീ ഫുഡ് റെസ്റ്റാറന്റ് എന്നാണതിന്റെ പേര്.

മെനു പരിശോധിക്കുന്ന യോങ്

“മുതല “മെനു

സീഫുഡ് ആണു മെയിന്‍ ഐറ്റം എങ്കിലും അവിടത്തെ പ്രധാന താരം മുതലയിറച്ചിയാണു.കഴിഞ്ഞ തവണ അത് കഴിക്കാനാകാത്തതിന്റെ വിഷമം തീര്‍ക്കാനായി ,കൈപൊള്ളുന്ന വിലയാണെങ്കിലും,ചെറിയൊരു ഡിഷ് ഓര്‍ഡര്‍ ചെയ്തു. താല്‍പ്പര്യ ക്കുറവ് മൂലം ,ആ വിഭവം കാണുവാന്‍ പോലും കൂട്ടാക്കാതെ,പ്രിയപത്നി അടുത്ത റ്റേബിളിലേക്ക് മാറിക്കഴിഞ്ഞു. എരിവു കൂടുതല്‍ കൊണ്ടാകണം പറയത്തക്ക രുചിയോ,രുചിഭേദമോ അനുഭവപ്പെട്ടുമില്ല!

ഭക്ഷണ ശേഷം,ഇന്നത്തെ ദിവസത്തെ അവസാന ഇനമായ ചെന്‍ക്ലാന്‍ അക്കദമി ലക്ഷ്യമാക്കി പുറപ്പെട്ടു.നഗരത്തിന്റെ കുപ്രസിദ്ധമായ ട്രാഫിക്-ജാം ഈ യാത്രയിലാണനുഭവപ്പെട്ടത്.പക്ഷെ വളരെ കാര്യക്ഷമമായി പ്രവര്‍ത്തിക്കുന്ന പോലീസ് സേന ഇതിന്റെ രൂക്ഷത കുറക്കാന്‍ കിണഞ്ഞ് പരിശ്രമിക്കുന്നുമുണ്ട്.

തലങ്ങും,വിലങ്ങും പോലീസ് ബൈക്കുകളും,കാറുകളും ചീറിപ്പായുന്നു.

അന്തരീക്ഷമാലിന്യം കുറക്കാനായി എലക്ടിക് ബസ്സുകളും

വെയില്‍ ചാഞ്ഞ്തുടങ്ങി.തിരക്കിനിടയിലൂടെ ചെന്‍ ക്ലാന്‍ അക്കാദമിയിലെത്തി.
ഗോങ്ങ്-ഡോങ്ങ് ഫോക് ആര്‍ട്ട് മ്യൂസിയമായി ഇപ്പോള്‍ ഇത് പ്രവര്‍ത്തിച്ച് വരുന്നു.

ചെന്‍ ക്ലാന്‍ അക്കാദമി
10 ആര്‍.എം.ബി യാണിവിടുത്തെ പ്രവേശന ടിക്കറ്റ് നിരക്ക്,ഏകദേശം എഴുപത് രൂപ. ഒന്നരലക്ഷം ച.അടി വിസ്തൃതിയില്‍ സ്ഥിതിചെയ്യുന്ന ഒരു മന്ദിരസമുച്ചയമാണിത്.

ചെന്‍ ക്ലാന്‍ അക്കാദമി

പത്തൊന്‍പത് കെട്ടിടങ്ങളും,ഒന്‍പത് വിശാലമായ ഹോളുകളും, ആറ് നടുമുറ്റങ്ങളും ചേര്‍ന്ന ഒരു സിമട്രിക് ബില്‍ഡിംഗ് കോമ്പ്ലക്സാണ് ഈ അക്കാദമി.ചെന്‍ ക്ലാന്‍ വംശജര്‍ പണിതുയര്‍ത്തി,ഇമ്പീരിയല്‍ പരീക്ഷ കേന്ദ്രമായി പ്രവര്‍ത്തിച്ച് വന്നിരുന്ന ഇവിടം ഇന്ന് ചൈനീസ് ശില്പചാതുര്യിയുടെ മകുടോദാഹരണമായി നില കൊള്ളുന്നു. ചൈനീസ് കരകൌശല വസ്തുക്കള്‍ ,മറ്റ് സോവനീറുകള്‍ തുടങ്ങിയവയെല്ലാം വില്‍പ്പനക്കായി വച്ചിട്ടുണ്ട്. ആനക്കൊമ്പുകളില്‍ തീര്‍ത്തിരിക്കുന്ന ശില്പങ്ങള്‍ അത്യന്തം മനോഹരവും വിലയേറിയതുമാണു.മറ്റു സോവനീറുകളും പൊള്ളുന്ന വിലയ്ക്ക് ധാരാളമായി നിരത്തിയിരിക്കുന്നു.ഒരു ടിപ്പിക്കല്‍ ചൈനീസ് ഭവനത്തിന്റെ മാതൃക,അടിക്കുറിപ്പുകള്‍ സഹിതം,ഭംഗിയായി പ്രദര്‍ശിപ്പിച്ചിട്ടുണ്ട്.പാശ്ചാത്യര്‍ ആണ് ഇവിടത്തെ സന്ദര്‍ശകരിലേറേയും,അതിനാല്‍ സോവനീര്‍ ഷോപ്പുകളില്‍ വില്‍പ്പനയും പൊടിപൊടിക്കുന്നുണ്ട്.
രണ്ട് മണിക്കൂറിലേറെ സമയമെടുത്ത്,എല്ലാം കണ്ട് തീര്‍ന്നു പുറത്തിറങ്ങുമ്പോള്‍ നേരം സന്ധ്യയായി.തിരികെ റൂമിലെത്തി,ചെറിയൊരു വിശ്രമത്തിനു ശേഷം കുറച്ച് ഷോപ്പിംഗ് നടത്തുവാന്‍ പത്നി പദ്ധതിയിട്ടിട്ടുണ്ട്.പ്രസിദ്ധമായ ബെയ്ജിംഗ്-ലു റോഡ് ഷോപ്പിംഗ് കേന്ദ്രം ഹോട്ടലില്‍ നിന്നും നടക്കാവുന്ന ദൂരത്താണെന്നും ആള്‍ രാവിലെ റിസപ്ഷനില്‍ നിന്ന് മനസ്സിലാക്കി വച്ചിട്ടുമുണ്ട്.അതിലേക്കായി തിരികെ ഹോട്ടലിലേക്ക് മടങ്ങി.

ഹോങ്കോങ്ങ് യാത്ര-ഭാഗം 1 ഇവിടെ വായിക്കാം

ഹോങ്കോങ്ങ് യാത്ര-ഭാഗം 2 ഇവിടെ വായിക്കാം

ഹോങ്കോങ് യാത്ര-2

2011-12-17T10:31:00.000-08:00

ഹോങ്കോങ് യാത്രാക്കുറിപ്പുകള്‍ -2

(ഹോങ്കോങ് യാത്രാക്കുറിപ്പുകള്‍-1 ഇവിടെ)

ഹോങ്കോങ് നഗരത്തിന്റെ ഒരു പ്രധാന ഭാഗമാണു കോവ് ലൂണ്‍.അവിടെയാണു ഞങ്ങളുടെ ഹോട്ടല്‍.കാര്‍ഹോട്ടലിന്റെപാര്‍ക്കിംഗഏരിയായിലെത്തി.ലഗേജുകളെല്ലാമെടുത്ത്,റിസപ്ഷനിലെത്തി ചെക്ക്-ഇന്‍ ചെയ്തു.തരക്കേടില്ലാത്ത ഒരു ഹോട്ടലാണു മെട്രോപാര്‍ക്ക്.ആദ്യം തന്നെ രണ്ട് സെറ്റ് ക്യാമറ ബാറ്ററികളും ചാര്‍ജ് ചെയ്യാന്‍ വച്ചു .ബാറ്ററികളുടെ ചാര്‍ജ് പോയതായിരുന്നു നേരത്തെയുണ്ടായ പ്രശ്നം. നേരം ഉച്ച കഴിഞ്ഞിരിക്കുന്നു,ഭക്ഷണം കഴിക്കണം.ഇന്ത്യന്‍ റെസ്റ്റോറന്റ് തേടി നടക്കാന്‍ സാധിക്കുകയില്ല,അതാത് സ്ഥലത്തെ ഭക്ഷണം കഴിക്കണം എന്ന് മുന്‍ കൂര്‍ കരാറിലാണു പ്രിയപത്നിയെ കൊണ്ടുവന്നിരിക്കുന്നതു തന്നെ.ഹോട്ടലിനു തൊട്ടടുത്ത് തന്നെയുള്ള ഒരു റെസ്റ്റോറന്റില്‍ നിന്നുംതനി ഹോങ്കോങ് ഭക്ഷണം തന്നെ കഴിച്ച്നഗരകാഴ്ചകള്‍ കാണുവാനായിറങ്ങി.

മോങ്കോക് ഈസ്റ്റ് സ്റ്റേഷന്‍

മോങ്കോക് റെയില്‍ വേ സ്റ്റേഷനാണു ആദ്യ ലക്ഷ്യം.അവിടെ നിന്നും,നേരത്തേ ഓണ്‍ലൈന്‍ റിസര്‍വേഷന്‍ നടത്തിയിരിക്കുന്ന ചൈനയിലേക്കുള്ള ട്രെയിന്‍ റ്റിക്കറ്റ് വാങ്ങണം.മറ്റന്നാള്‍ വൈകിട്ടാണു ഗോങ്ചോയ്ക്കുള്ള ട്രെയിന്‍. നടക്കാവുന്ന ദൂരത്താണു ഈ സ്റ്റേഷന്‍. സ്റ്റേഷനിലെത്തി.നമ്മുടെ നാട്ടിലെ ഒരു ചെറിയ വിമാനത്താവളം പോലെയുണ്ട് മോങ്കോക് ഈസ്റ്റ് സ്റ്റേഷന്‍.വലിയ ഒരു ഷോപ്പിങ് മോളിനുള്ളിലായാണു സ്റ്റേഷന്‍ സ്ഥിതി ചെയ്യുന്നത്.കസ്റ്റമര്‍ സര്‍വീസ് സെന്ററിലെത്തി റ്റിക്കറ്റും വാങ്ങി പുറത്തു കടന്നു.

മോങ്കോക് ഈസ്റ്റ് സ്റ്റേഷന്‍

സമയം വളരെക്കുറവായതു കൊണ്ട് കാഴ്ചകളെല്ലാം തിടുക്കത്തില്‍ കണ്ട് തീര്‍ക്കാനാണു പരിപാടി.വൈകും വരെ ഇവിടെല്ലാം ഒന്നു ചുറ്റിക്കറങ്ങി,രാത്രിയിലത്തെ ഹോപ് ഓണ്‍-ഹോപ് ഓഫ് ബസ്സില്‍ നഗരക്കാഴ്ചകള്‍ കാണാനാണു പദ്ധതി.ആദ്യം മോങ്കോക് ബേര്‍ഡ് മാര്‍കറ്റിലെത്തി,പക്ഷികളേയും മറ്റും വില്‍ക്കുന്ന ഒരിടം,നമുക്ക് താല്പര്യം തോന്നുന്നതൊന്നുമില്ല താനും.ടാക്സി കാശ് സ്വാഹ! നഗരത്തിന്റെ പ്രധാന ഷോപ്പിങ് ഏരിയായിലേക്ക് തിരിച്ചു.സിം-ഷ സൂയ് എന്ന സ്ഥലത്താണിപ്പോള്‍,വളരെ തിരക്ക് പിടിച്ച ഒരിടം,നിറയെ കടകള്‍.

സിം-ഷ സൂയ്

എവിടേയും സൌന്ദര്യ വര്‍ധക വസ്തുക്കളുടെയും മറ്റുംബ്രാണ്ടഡ് ഷോപ്പുകള്‍.അതിലൂടെയെല്ലാം ഒന്ന് ചുറ്റിയടിച്ചപ്പോഴേക്കും സമയം സന്ധ്യയായി,ഇനി ഹോപ് ഓണ്‍-ഹോപ് ഓഫ് ബസ് പിടിക്കണം.ഒരു റ്റാക്സിയില്‍ ബസ് പിക്ക്-അപ് ഏരിയയിലേക്ക് തിരിച്ചു.പൊടുന്നനെ മഴ തുടങ്ങിയിരിക്കുന്നു,അതും നല്ല ശക്തമായ മഴ.ഹോങ്കോങില്‍ അങ്ങനെയാണത്രേ ഒരു മുന്നറിയിപ്പുമില്ലാതെയാണു മഴ വരുന്നതും പോകുന്നതും.മുകള്‍ഭാഗം തുറന്ന ബസിലെ യാത്ര നടക്കില്ലെന്നുറപ്പായി.അതോടെ ഒരു ഷോപ്പിങ്മാളിനു സമീപമിറങ്ങി.അതിന്റെ വാതില്‍ക്കല്‍ തന്നെ തെക്കേഇന്ത്യന്‍ ഛായയുള്ള കുറെ ചെറുപ്പക്കാര്‍.കോഴിക്കോട്ടുകാരന്‍ ഫസലും സംഘവുമാണു.അവര്‍ ചൈനയില്‍ വിദ്യാഭ്യാസം നടത്തുന്നവരാണു,അതോടൊപ്പം ചെറിയ കച്ചവടവും.അതിന്റെ ഭാഗമായി ഇവിടെ എത്തിയതാണു.കുശലപ്രശ്നം കഴിഞ്ഞിട്ടും മഴ തോരുന്ന മട്ടില്ല,സമയം എട്ടര മണിയായിരിക്കുന്നു,രക്ഷയില്ല.വീണ്ടും ടാക്സിയില്‍ ഹോട്ടലിലേക്ക്.ഇന്നത്തെ കാഴ്ചകള്‍ തഥൈവയായിരിക്കുന്നു.ഒരു സൂപ്പും അകത്താക്കി,കുറച്ച് പഴങ്ങളും വാങ്ങി തിരികെ മുറിയിലെത്തി.കുളി കഴിഞ്ഞ് ഉറങ്ങാന്‍ കിടക്കുമ്പോഴും ഹോപ് ഓണ്‍-ഹോപ് ഓഫ് ബസ്സില്‍ കയറി നഗരക്കാഴ്ചകള്‍ കാണാന്‍ കഴിയാത്തതിലുള്ള വിഷമം മാറിയിരുന്നില്ല.
പിറ്റേന്ന് അതിരാവിലെ തയ്യാറായി ഹോട്ടല്‍ റിസപ്ഷനിലെത്തി.എട്ടു മണിക്കാണു വിശ്വ പ്രസിദ്ധമായ ഡിസ്നി ലാന്റ് ടൂറിനായി പോകേണ്ടത്.കൃത്യ സമയത്ത് തന്നെ വാഹനം എത്തി.നഗരാതിര്‍ത്തി പിന്നീട്ടതും ചെറു മഴ തുടങ്ങി.ഇത്തവണ മഴ കൃത്യമായി കൂടെയുണ്ടെന്ന് തോന്നുന്നു.(ഇത്തവണ ഒപ്പം വന്നിരിക്കുന്ന ആളുടെ സമയം കൊണ്ടാകാം ഹ ഹ ) യാത്ര കുളമാകാനുള്ള എല്ലാ സാദ്ധ്യതയും മുന്നില്‍ തെളിയുന്നു.ഭാഗ്യം ഏതായാലും മഴ നീണ്ടുനിന്നില്ല,എന്നു മാത്രമല്ല പിന്നീടങ്ങോട് ഒരു ദിവസം പോലും മഴ ശല്യപ്പെടുത്തിയതുമില്ല.ആളുടെ സമയം മോശമല്ല!!.ഇടദിവസമായതു ഡിസ്നിലാണ്ടിലേക്കുള്ള റോഡിലും വലിയ തിരക്കില്ല.

വലിയ കമാനങ്ങളുള്ള പാലങ്ങളിലൂടെയൊക്കെ കാര്‍ നീങ്ങിക്കൊണ്ടിരുന്നു. അരമണിക്കൂര്‍ കൊണ്ട് ഡിസ്നി ലാന്റ് പാര്‍ക്കിങ്ങിലെത്തി,ഇവിടുന്നങ്ങോട് സ്വകാര്യവാഹനങ്ങള്‍ കടത്തി വിടുകയില്ല.ടിക്കറ്റും കയ്യിലേല്‍പ്പിച്ച് ഡ്രൈവര്‍ തിരികെപ്പോയി.

ഡിസ്നി ലാന്റ്

പ്രവേശന കവാടം ദൂരെനിന്നേ കാണാം.തരക്കേടില്ലാത്ത ആള്‍ത്തിരക്കും.ക്യൂവിലൂടെ അകത്ത് പ്രവേശിച്ചു,വിശദമായ പരിശോധനകള്‍ക്ക് ശേഷമാണു പ്രവേശനം,ഭക്ഷണ സധനങ്ങളൊന്നും അനുവദനീയമല്ല.ആദ്യം തന്നെ ഒരു മാപ് സംഘടിപ്പിച്ചു.(പലരും, പലവുരു മനോഹരമായി പറഞ്ഞ, ഡിസ്നി ലാന്റ് കാഴ്ചകള്‍ വര്‍ണ്ണിക്കുന്നത് അരോചകമാകുമെന്നുള്ളതു കൊണ്ട് അതിനു മുതിരുന്നില്ല,ഒരു ചെറിയ വിവരണം മാത്രം).
ആദ്യം തന്നെ ഡിസ്നി ലാന്റ് റെയിലില്‍ ഒരു യാത്ര ആകാമെന്നു കരുതി.നല്ല ജനക്കൂട്ടം തന്നെ ക്യൂവിലുണ്ട്.ഡിസ്നി ലാന്റിനു ഒന്നു വലം വച്ചു വരാം ഈ ട്രെയിനില്‍.

ഡിസ്നി ലാന്റ് സ്റ്റേഷന്‍

പാര്‍ക്കിനെക്കുറിച്ച് ഒരു ധാരണയും ലഭിക്കും.ട്രെയിനില്‍ ഒന്നല്ല,രണ്ടു തവണ വലം വച്ചു.

ടാര്‍സന്‍ ഐലന്റ്

ടാര്‍സന്‍ ഐലന്റിലെ പ്ലാസ്റ്റിക് വൃക്ഷം

പിന്നീട് എല്ലാ ഭാഗങ്ങളും ചുറ്റിക്കണ്ടതിനു ശേഷം അഡ്വെഞ്ചര്‍ ലാന്റ് രെസ്റ്റോറന്റില്‍ നിന്നു ഉച്ച ഭക്ഷണവും കഴിച്ച് ,അതിനോടു ചേര്‍ന്നുള്ള തടാകത്തിലൂടെ ഒരു ചങ്ങാട യാത്രയും നടത്തിവിവിധ റൈഡുകളെല്ലാംആ സ്വദിച്ച്,3ഡി തീയേറ്ററിലെ സിനിമാ പ്രദര്‍ശനവും കഴിഞ്ഞപ്പോഴേക്കും ഡിസ്നി ലാന്റ് പരേഡ് തുടങ്ങി.അപ്പോഴേക്കും നേരം ഇരുട്ടിതുടങ്ങിയിരിക്കുന്നു.ആബാലവൃദ്ധം ജനങ്ങളും ആസ്വദിക്കുന്ന നിരവധികാഴ്ചകള്‍ കൊണ്ട് സമ്പന്നമാണു ഇവിടം എന്ന് പറയാതെ വയ്യ.
തിരികെ ഡിസ്നി ലാന്റ്റെയില്‍ വേ സ്റ്റേഷനില്‍ നിന്നും മെട്രോയില്‍ മടങ്ങാനാണു പരിപാടി.വെണ്ടിങ്മെഷീനില്‍ നിന്നും ടിക്കറ്റും വാങ്ങി പ്ലാറ്റ്ഫോമിലേക്കിറങ്ങി.

ഡിസ് നി ലാന്റ് മെട്രോ റെയില്‍ വേ സ്റ്റേഷന്‍

ഹോങ്കോങ് മെട്രോ

വളരെ കാര്യക്ഷമമായി പ്രവര്‍ത്തിക്കുന്ന ഒരു സിസ്റ്റമാണു ഈ മെട്രോയുടേത്.വിവിധ നിറങ്ങളിലുള്ള ലൈനുകള്‍.യാതൊരു സംശയത്തിനും ഇടവരാതെ ,ട്രെയിനുകള്‍ മാറിക്കയറി നമ്മള്‍ക്ക് ലക്ഷ്യസ്ഥാനത്തെത്താം.മൂന്നു ട്രെയിനുകള്‍ മാറിക്കയറേണ്ടി വന്നിട്ടും,ആരോടും വഴിപോലും ചോദിക്കാതെ,ഞങ്ങള്‍ക്ക് താമസസ്ഥലത്തെത്താനായി എന്നതു തന്നെ ഈ മെട്രോയുടെ കാര്യ ക്ഷമതക്കുദാഹരമാണല്ലോ.കൊച്ചിമെട്രോയുംഇങ്ങനെയാകുമെന്ന്നമുക്കാശിക്കാം! ചെറിയൊരാഹാരത്തിനു ശേഷം തിരികെ മുറിയിലെത്തി.നാളെ ഒരു ഹാഫ് ഡേ സിറ്റി ടൂര്‍ ബുക്ക് ചെയ്തിട്ടുണ്ട്.അതിനുശേഷം വൈകിട്ടുള്ള ട്രെയിനില്‍ ചൈനക്ക് തിരിക്കണം.
രാവിലെ ഹോട്ടല്‍ ലോബിയിലെത്തി .7.55 നു തന്നെ ഗൈഡ് എത്തിക്കഴിഞ്ഞു.ഇവോണ്‍ എന്നു പേരായ ഒരു യുവതിയാണു ഇന്നത്തെ ഗൈഡ്. ഇവരുടെ സമയക്ലിപ്തത വളരെ അഭിനന്ദാര്‍ഹമാണു.ഇത്തവണ ഒരു മിനിവാനിലാണു യാത്ര.രണ്ട് ഹോട്ടലുകളില്‍ നിന്നും സഹയാത്രികരേയും കയറ്റി യാത്ര തുടര്‍ന്നു.മൂന്ന് അമേരിക്കന്‍ കുടുംബങ്ങളാണു സഹയാത്രികര്‍.തമാശയൊക്കെ പറഞ്ഞ്,ചിരിച്ചുല്ലസിച്ചാണു അവരുടെ യാത്ര.“മാ“ എന്ന ബുദ്ധക്ഷേത്ര സന്ദര്‍ശനമാണു പരിപാടിയിലെ ആദ്യ ഇനം.

ബുദ്ധക്ഷേത്രം

വളരെ പുരാതനമായ ഈ ക്ഷേത്രത്തില്‍ നവീകരണപ്രവര്‍ത്തനങ്ങള്‍ നടന്ന് കൊണ്ടിരിക്കുകയാണു.അവിടെ നിന്നും പുറത്തിറങ്ങി കുറെസമയം കഴിഞ്ഞിട്ടും ഒരു അമേരിക്കന്‍ ദമ്പതികള്‍ എത്തിയിട്ടില്ല.ക്ഷേത്രത്തില്‍ ദീര്‍ഘമായ പ്രാര്‍ത്ഥനയില്‍ മുഴുകിയിരിക്കുകയാണവര്‍.ആ സമയം കൊണ്ട് കുറച്ച് ചിത്രങ്ങളെടുത്തു.അപ്പോഴേക്കും അവരെത്തി.ഇനി വിക്ടോറിയാ പീക് ആണു അടുത്ത് ലക്ഷ്യം.10 മിനിറ്റുനുള്ളില്‍ താഴ്വാരത്തെത്തി.വലിയ തിരക്കൊന്നുമില്ല.ട്രാ‍മിലാണു മല കയറ്റം.

വിക്ടോറിയ പീക് ട്രാം

ഇവോണ്‍ റ്റിക്കറ്റ് വാങ്ങി വന്നു.വളരെ പതുക്കെ ഒരു ട്രാം വന്നു നിന്നു.നമ്മുടെ ബസിന്റെ ആകൃതിയിലുള്ള ഒരു വാഹനം.മരത്തിന്റെ സീറ്റുകളും,രണ്ട് വശവും കാഴ്ചകള്‍ കാണാനുതകുന്ന വിശാലമായ ഗ്ലാസ് ജനലുകളും ഇതിന്റെ പ്രത്യേകതകളാണു.ഇരുപത്തിയഞ്ചോളം പേര്‍ക്ക് ഒരു ട്രാമില്‍ സഞ്ചരിക്കാനാകും.ട്രാം മെല്ലെ നീങ്ങിത്തുടങ്ങി.ഉയരത്തിലേക്കെത്തുമ്പോഴേക്കും കൂടുതല്‍ കൂടുതല്‍ കാഴ്ചകള്‍ കണ്‍ മുന്നില്‍ തെളിഞ്ഞു തുടങ്ങി.

7-8 മിനിറ്റ് കൊണ്ട് ട്രാം പീകിലെത്തിക്കഴിഞ്ഞു.അര മണിക്കൂര്‍ ആണു ഗൈഡ് അവിടെ അനുവദിച്ചിരിക്കുന്ന സമയം.പീക്കില്‍ നിറയെ സഞ്ചാരികളാണു,ഏവരും ചിത്രങ്ങളെടുക്കുന്ന തിരക്കിലും.താഴെ ഹോങ്കോങ് നഗരത്തിലെ അംബര ചുംബികള്‍ വ്യക്തമായി കാണാം.ഇവിടെനിന്നും രാത്രിയിലെ ലേസര്‍ വെളിച്ചത്തില്‍ മുങ്ങിയ നഗരകാഴ്ചകളാണു ചേതോഹരം എന്നു ഇവോണ്‍ പിന്നീട് പറയുകയുണ്ടായി.നിരവധി സുവനീര്‍ ഷോപ്പുകളും,റെസ്റ്റോറന്റുകളും ഇവിടെ പ്രവര്‍ത്തിക്കുന്നുണ്ട്.മറ്റേതൊരു ടൂറിസ്റ്റ്കേന്ദ്രത്തേയും പോലെ തീ വിലയും. ഇവോണിന്റെ കര്‍ക്കശ സ്വഭാവം കൊണ്ടാകാം ഇപ്രാവശ്യം പറഞ്ഞ സമയത്ത് തന്നെ എല്ലാവരും തിരിച്ചെത്തിക്കഴിഞ്ഞു .അബര്‍ഡീന്‍ ഫിഷിങ് വില്ലേജാണു ഇനി കാണുവാനുള്ള ഒരു പ്രദേശം.മലയിറങ്ങി വാന്‍ ചെറിയ ഒരു ബോട്ട്ജെട്ടിയിലെത്തി.വിശാലമായ ഒരു പ്രദേശമാണിവിടം,സന്ദര്‍ശകരെക്കാത്ത് നിരവധി ബോട്ടുകള്‍.20 മിനിറ്റ് നീളുന്ന ഒരു ബോട്ട് യാത്ര

. ഒരു വല്യമ്മ ഞങ്ങള്‍ക്കുള്ള ബോട്ടുമായി കാത്ത് നില്‍ക്കുന്നുണ്ട്.

അനവധിബോട്ടുകള്‍ക്കിടയിലൂടെ ഒന്നു ചുറ്റിക്കറക്കി, തിരികെ ബോട്ട്ജെട്ടിയിലിറക്കി, ആളൊന്നിനു 60 ഡോളറും വാങ്ങി വല്യമ്മ സ്ഥലം വിട്ടു.യാതൊരു മൂല്യവുമില്ലാത്ത ഒരു പരിപാടിയായിട്ടാണു ഇതെനിക്കനുഭവപ്പെട്ടത്.തുടര്‍ന്നു, മറ്റ് പലരാജ്യങ്ങളിലേയും ,പതിവു പരിപാടിയായ,ജെം ഫാക്ടറി സന്ദര്‍ശനമായിരുന്നു.തിടുക്കത്തില്‍ ഞങ്ങള്‍ അതിനുള്ളില്‍ നിന്നും പുറത്തിറങ്ങി, ഈ ഹാഫ് ഡേ ടൂറിലെ അവസാന ഇനമായ, പ്രസിദ്ധമായ സ്റ്റാന്‍ലി മാര്‍ക്കറ്റിലേക്ക് യാത്രയായി.

സ്റ്റാന്‍ലി മാര്‍ക്കറ്റ്

അവിടുത്തെ ഷോപ്പിങ്ങിനു ശേഷം എല്ലാവരും അവരവരുടെ വഴിയ്ക്ക് പിരിയുകയാണു.ഞങ്ങളെ ഹങ്-ഹോം സ്റ്റേഷനിലിറക്കാമെന്നാണു ഇവോണിന്റെ വാഗ്ദാനം.സാമാന്യ വിലക്കു സാധനങ്ങള്‍ ലഭിക്കുന്ന വലിയൊരു മാര്‍ക്കറ്റാണിവിടം.അല്ലറ ചില്ലറ ഷോപ്പിങ്ങിനു ശേഷം ഏകദേശം 3 മണിയോടെ ഞങ്ങളെ സ്റ്റേഷനിലിറക്കി,കര്‍ക്കശക്കാരിയായ ആ ഗ്ഗൈഡ്,ഇവോണ്‍ വിട പറഞ്ഞു.സ്റ്റാന്‍ലി മാര്‍ക്കറ്റില്‍ വച്ചു തന്നെ അമേരിക്കന്‍ കുടുംബങ്ങളും യാത്ര പറഞ്ഞിരുന്നു.
വളരെ വലിയൊരു റെയില്‍ വേ സ്റ്റേഷനാണു ഹങ്-ഹോം.

ഹങ്-ഹോം സ്റ്റേഷന്‍

ചൈന മെയിന്‍ ലാന്റിലേക്കുള്ള ട്രെയിനുകളെല്ലാം ഇവിടെ നിന്നുമാണു പുറപ്പെടുന്നത്.അനേകം ഷോപ്പുകളും,റെസ്റ്റോറന്റുകളും ഇതിനകത്തുണ്ട്.മക് ഡോണാള്‍ഡില്‍ നിന്നും ഭക്ഷണ ശേഷം ഞങ്ങള്‍ ചെക്ക്-ഇന്‍ കൌണ്ടറിലേക്ക് നടന്നു.ചൈനയിലെ ഗോങ് ഡോങ് പ്രവിശ്യയിലുള്ള,ഗോങ്-ചോ നഗരത്തിലേക്കാണു ഞങ്ങളുടെ യാത്ര. ഇമ്മിഗ്രേഷന്‍,കസ്റ്റംസ് നടപടികള്‍ മുതലായവ ഇവിടെ പൂര്‍ത്തിയാക്കാനുണ്ട്.അവിടെ ചെന്നപ്പോഴുണ്ട് സാമാന്യം വലിയൊരു ക്യൂ! നൂറു പേരോളം മുന്നിലുണ്ട്.4.35 നു ആണു ട്രെയിന്‍,കൌണ്ടര്‍ 4.00 മണിക്കു മാത്രമേ തുറക്കുകയുള്ളൂ താനും.അതിനിടയ്ക്കു കര്‍ശനമായ ലഗേജിന്റെ സൈസ് പരിശോധനയും.ചെറിയ ടെന്‍ഷനുമായി ,കൌണ്ടര്‍ തുറക്കുന്നതു കാത്ത് ഞങ്ങളും ആ ക്യൂവിന്റെ ഭാഗമായി കാത്തു നിന്നു.

.

ഹോങ്കോങ് യാത്ര

2011-10-29T09:18:00.000-07:00

ഹോങ്കോങ് യാത്രാക്കുറിപ്പുകള്‍ -1

ചെറുപ്പം മുതലേ കേട്ടിരുന്ന ഒരു സ്ഥല പേരായിരുന്നു ഹോങ്കോങ്.ചില സ്വന്തക്കാര്‍ അവിടെയുണ്ടായിരുന്നു എന്ന് കേട്ടിട്ടുള്ളതു കൊണ്ടാവാം,ആ പേരിനോടൊരു മമത തോന്നിയിരുന്നത്.മാത്രവുമല്ല,പണ്ടൊരു ഐ.വി.ശശി സിനിമയില്‍ (ഇനിയെങ്കിലും?) ആ നാടിന്റെ കാഴ്ചകള്‍ കണ്ട ചെറിയ ഒരോര്‍മ്മയും.

ഹോങ്കോങ് നഗരത്തിന്റെ ഒരു വിദൂരകാഴ്ച

കഴിഞ്ഞ ചൈനാ യാത്രയില്‍, ഇടക്കൊരു മൂന്ന് ദിവസം ചൈനയില്‍ നിന്നും ഹോങ്കോങിലെത്തി, ഹോങ്കോങ് നഗരം കൂടികാണണമെന്ന് തീരുമാനിച്ചിരുന്നെങ്കിലും ആ പരിപാടി നടന്നില്ല.ചൈന വിസ,സിംഗിള്‍ എന്‍ട്രി ആയിപ്പോയതാണു കാരണം.എന്തായാലും ഈ യാത്രയില്‍ ആദ്യം ഹോങ്കോങ് നഗരം ചുറ്റിക്കണ്ട്,പിന്നീട് ട്രെയിന്‍ മാര്‍ഗ്ഗം ചൈനയില്‍ എത്തിച്ചേരുവാനുള്ള പദ്ധതിയാണു തയ്യാറാക്കിയത്.

കൊച്ചിയില്‍ നിന്നും എയര്‍ ഏഷ്യ വിമാനക്കമ്പനി സര്‍വീസ് തുടങ്ങിയത് മൂലമാണു എന്റെ മിക്കവാറും യാത്രകളെല്ലാം തരമായത് എന്ന് ആദ്യം തന്നെ പറഞ്ഞു കൊള്ളട്ടെ.കഴിഞ്ഞ വര്‍ഷമാദ്യം,അതായത് 2010 ജനുവരിയില്‍, എയര്‍ ഏഷ്യ കൊച്ചിയില്‍ നിന്നും സര്‍വീസ് തുടങ്ങുമ്പോള്‍,അതു വരെ ഇങ്ങനെയൊരു വിമാനക്കമ്പനിയെക്കുറിച്ച് കേട്ടറിവ് പോലുമില്ലായിരുന്നു.വെറും അയ്യായിരം രൂപയ്ക്ക് മലേഷ്യയ്ക്ക് പോയിവരാം എന്ന് പരസ്യം കണ്ടപ്പോള്‍ അത്ര വിശ്വാസം തോന്നിയതുമില്ല.പക്ഷെ അന്നുമുതലിങ്ങോട് വളരെ പ്രയോജനപ്രദമായ ഒരുപാട് യാത്രകള്‍ ഈ ചെലവ്കുറഞ്ഞ വിമാനകമ്പനി സമ്മാനിച്ചു.
ഈ പ്രാവശ്യം യാത്രയില്‍ പ്രിയപത്നിയും ചേരുന്നു എന്ന് നേരത്തെതന്നെ അറിയിച്ചിരുന്നു.സാധാരണ യാത്രകളെല്ലാം സ്നേഹിതരോടൊപ്പമാണു.എന്നാല്‍ ഇത്തവണ ഞങ്ങള്‍ രണ്ടാള്‍ മാത്രം.ഒപ്പം വരാമെന്ന് സമ്മതിച്ചിരുന്ന ഒരു അഭിഭാഷക കുടുംബം സമയമായപ്പോള്‍ യാത്ര റദ്ദാക്കി.

അങ്ങനെ പതിവ് പോലെ കൊച്ചിയില്‍ നിന്നും കുലാലമ്പൂര്‍ എത്തിച്ചേര്‍ന്നു.എയര്‍ ഏഷ്യ സര്‍വീസില്‍,കൊച്ചിയില്‍ നിന്നും, കുലാലമ്പൂര്‍ വഴി മാത്രമെ യാത്ര ചെയ്യാന്‍ സാധിക്കൂ.സമയം അര്‍ദ്ധരാത്രിയായിരിക്കുന്നു.കഴിഞ്ഞ പ്രാവശ്യം വിമാനത്താവളത്തിലിരുന്നു നേരം വെളുപ്പിച്ച അനുഭവമുള്ളത് കൊണ്ട് കാലേകൂട്ടി എല്‍.സി.സി.റ്റി വിമാനത്താവളത്തിനടുത്തുള്ള ട്യൂണ്‍ ഹോട്ടലില്‍ റൂം ബുക്ക് ചെയ്തിരുന്നു.വിമാനത്താവളത്തില്‍ നിന്നും 1കിമി മാത്രം ദൂരമുള്ള ഈ ഹോട്ടലിലേക്ക് ഹോട്ടലുകാരുടെ വക ഷട്ടില്‍ ബസ് ,പതിനഞ്ച് മിനിറ്റ് ഇടവേളകളില്‍, ഉണ്ട്.ചാര്‍ജ് 1 മലേഷ്യന്‍ റിംഗ്ഗിറ്റ് .ബസ്സില്‍ കയറി ഹോട്ടലില്‍ എത്തി.ആദ്യമായാണു ഇവിടെ തങ്ങുന്നത്.ചെക്-ഇന്‍ ചെയ്ത് മുറിയിലെത്തിയപ്പോള്‍ മാത്രമാണു മുറിയുടെ വലിപ്പം മനസ്സിലായത്,കഷ്ടിച്ചൊരു 90 സ്ക്വയര്‍ഫീറ്റ്!!2പെട്ടികള്‍ സഹിതം മുറിയില്‍ കയറിയാല്‍ പിന്നെ കിടക്കയില്‍ ഇരിക്കുക മാത്രമേ രക്ഷയുള്ളൂ,കാല്‍കുത്താന്‍ പോലും മുറിയില്‍ സ്ഥലമില്ല.
റ്റോയ് ലറ്റിനു അത്യാവശ്യ വലിപ്പമുണ്ട്.പെട്ടിയൊക്കെ ഒന്നടുക്കിവച്ച്,ഒരു വിധത്തില്‍ മുന്‍ വശത്തുള്ള വരാന്തയിലെത്തിയപ്പോഴാണു രസകരമായ ആ കാഴ്ച കണ്ടത്.ഞങ്ങളോടൊപ്പം വിമാനത്തിലുണ്ടായിരുന്ന,ന്യൂസീലാന്റില്‍ സെറ്റില്‍ ചെയ്തിരിക്കുന്ന,മലയാളി അദ്ധ്യാപക ദമ്പതികള്‍ ,തങ്ങളുടെ വലിയപെട്ടികള്‍ മുറിക്കകത്ത് കയറ്റാനാവാതെ കുഴങ്ങുന്നു!പിന്നെ അവരോടൊപ്പം കൂടി,ഏഴെട്ട് വലിയ പെട്ടികള്‍ വരാന്തയുടെ മൂലക്കും,ഞങ്ങളുടെ മുറിയിലും ഒക്കെ കുത്തിക്കയറ്റി അഡ്ജസ്റ്റ് ചെയ്ത് ഒരു പ്രകാരം മുറിക്കകത്ത് തിരികെ കയറി.പിറ്റേന്ന് അതിരാവിലെയാണു ഹോങ്കോങ് വിമാനം.അലാറം സെറ്റ് ചെയ്ത് ഹ്രസ്വമായ ഒരുറക്കത്തിലേക്ക് വഴുതി വീണു.
വെളുപ്പിനെ ഉണര്‍ന്ന് തയ്യാറായി,ന്യൂസിലാന്റുകാരുടെ ബാഗുകള്‍ താഴെ ഏല്‍പ്പിച്ച്, റൂം ചെക് ഔട്ട് ചെയ്ത്,ഷട്ടില്‍ബസില്‍ തന്നെ വിമാനത്താവളത്തിലെത്തി.
കുലാലമ്പൂര്‍ എല്‍.സി.സി.റ്റി വിമാനത്താവളം അക്ഷരാര്‍ത്ഥത്തില്‍ നമ്മുടെ ഒരു റെയില്‍ വേ സ്റ്റേഷന്‍ പോലെതന്നെയാണു.കുറച്ച്കൂടി വിപുലമായ സൌകര്യങ്ങുളെണ്ടെന്ന് മാത്രം.തൊണ്ണൂറ് ശതമാനവും സാധാരണക്കാരായ യാത്രക്കാര്‍ അവരുടെ കെട്ടും കിടയുമായി തലങ്ങും വിലങ്ങും നടക്കുന്നത് കാണാം.ധാരാളമായി തമിഴ് വംശജരേയും കാണാം. വളരെ സൌഹ്രുദപൂര്‍വ്വം പെരുമാറുന്ന ഉദ്യോഗസ്ഥരാണു ഭൂരിഭാഗവും.ഞങ്ങള്‍ എയര്‍പോര്‍ട്ടിലെത്തുമ്പോള്‍ ചെക്ക്-ഇന്‍ കൌണ്ടര്‍ തുറന്ന് വരുന്നതേയുള്ളൂ.ബോര്‍ഡിംഗ് പാസും പരിശോധനകളും പൂര്‍ത്തിയാക്കി വിമാനത്തില്‍ കയറി.കുറച്ച് കഴിഞ്ഞപ്പോഴേക്കും മുന്‍ കൂട്ടി ഓര്‍ഡര്‍ ചെയ്തിരുന്ന പ്രാതലുമായി തമിഴ്വംശജ എയര്‍ഹോസ്റ്റസ് എത്തി.അതും കഴിച്ച് നല്ലൊരു ഉറക്കം.
വിമാനം ഹോങ്കോങില്‍ ലാന്റ് ചെയ്യാന്‍ പോകുന്നു എന്ന അറിയിപ്പ് കേട്ടാണുണര്‍ന്നത്.സമയം 11.15 ആയിരിക്കുന്നു.മലേഷ്യന്‍ സമയം തന്നെയാണിവിടേയും.
വിമാനത്താവളത്തിലെത്തി.ഒരു പടുകൂറ്റന്‍ വിമാനത്താവളം.ബാഗേജിനും,ഇമിഗ്രേഷനും വേണ്ടി കാണിച്ചിരിക്കുന്ന ബോര്‍ഡുകള്‍ നോക്കി നോക്കി,ഒരു എസ്കലേറ്റര്‍ വഴി താഴെ നിലയിലെത്തി.ഒരു റെയില്‍ വേ പ്ലാറ്റ്ഫോമാണത്.ചെറുട്രെയിനുകള്‍ വന്നു നില്‍ക്കുന്നു,ആളുകള്‍ കയറുന്നു,എങ്ങോടാണെന്നു മാത്രം ഒരു പിടിയും കിട്ടുന്നില്ല.അടുത്ത് നിന്നിരുന്ന ഒരു തമിഴ് കുടുംബത്തോട് ചോദിച്ചപ്പോഴാണു കാര്യം പിടികിട്ടിയത്.

ഹോങ്കോങ് എയര്‍പോര്‍ട്ട്.-എമിഗ്രേഷനിലേക്കുള്ള ട്രെയിന്‍

ലഗേജ് ഏരിയയിലേക്കുള്ള ട്രെയിന്‍ ആണത്.അടുത്ത ട്രെയിനില്‍ കയറി,ഏകദേശം ഒരു മിനിറ്റ് യാത്രക്കു ശേഷം ഇമിഗ്രേഷനിലെത്തിയപ്പോള്‍ വലിയ തിരക്കു,ഒരഞ്ഞൂറ്പേര്‍ മുന്നില്‍!കൂടുതലും ആഫ്രിക്കന്‍ വംശജരും,സായിപ്പന്മാരും.ഇന്ത്യാക്കാര്‍ വളരെകുറച്ച് മാത്രം.ഹോങ്കോങില്‍ സന്ദര്‍ശന വിസ സൌജന്യമാണു,ബാക്കിയെല്ലാത്തിനും വളരെ കൂടുതലും.സൌജന്യ വിസക്കുപകരം ഹോട്ടലും,ടാക്സിയുമെല്ലാം ചേര്‍ത്ത് വിസയുടെ മുതലും പലിശയും കൂടി അവര്‍ വാങ്ങുന്നുണ്ട്.കൌണ്ടറിലിരുന്ന എമിഗ്രേഷന്‍ ഓഫീസര്‍ യാതൊരു ചോദ്യവും കൂടാതെ 20 ദിവസ സന്ദര്‍ശനം അനുവദിച്ചു തന്നു.പിന്നീട് ലഗ്ഗേജ് റീക്ലെയിം ഏരിയയിലെത്തി ബാഗുകളെല്ലാമെടുത്തു.

എയര്‍പോര്‍ ട്ട് അറൈവല്‍ ഹോള്‍

വളരെ വലിയ ഹോളാണത്,ഒരു ഫോട്ടോ എടുക്കാം എന്ന് കരുതി ക്യാമറ ബാഗില്‍നിന്നും എടുത്ത് നോക്കിയപ്പോള്‍ ബാറ്ററിപവര്‍ ഇല്ല.അടുത്ത സെറ്റ് ബാറ്ററിയും തഥൈവ! അല്ലെങ്കിലും ഈ വക കാര്യങ്ങള്‍,ക്യാമറ ലാപ് റ്റോപ് തുടങ്ങിയവ,ഞാനുമായി എല്ലായ്പ്പോഴും മുന്നാളാണല്ലൊ.(പതിവ് പോലെ മൊബൈലില്‍ ഒന്ന് രണ്ട് ചിത്രമെടുത്തു,നമുക്കതേ പറഞ്ഞിട്ടുള്ളൂ.)
അറൈവല്‍ ഹോളില്‍ നിറയെ ഹോട്ടലുകാരുടെ പ്രതിനിധികള്‍ ആണു,പ്രീപെയ്ഡ് ടാക്സി കൌണ്ടറുകളും

.ഞങ്ങളുടെ താമസസ്ഥലമായ കോവ് ലൂണ്‍ ഭാഗത്തേക്ക് 100 എച്.കെ ഡി ആണു ചാര്‍ജ്.ഒരു ടാക്സിയില്‍ കയറി ഹോട്ടലിലേക്ക് തിരിച്ചു.ഏകദേശം 40 മിനിറ്റ് യാത്രയുണ്ട് ഹോട്ടലിലേക്ക്.വലിയ പാലങ്ങളും ടണലുമെല്ലാം താണ്ടിയാണു യാത്ര.വളരെ മികച്ച ഒരു ട്രാഫിക് സിസ്റ്റമാണിവിടെ.ഒട്ടേറെ വാഹനങ്ങള്‍ ചീറിപ്പായുന്നുണ്ടെങ്കിലും,ഉച്ച നേരമായതു കൊണ്ടാണോ എന്തോ ട്രാഫിക് ബ്ലോക്ക് എങ്ങും അനുഭവപ്പെടുന്നില്ല.

മികവുറ്ററോഡുകളുംപാലങ്ങളും, ചുറ്റുംഅംബരചുംബികള്‍. നഗരത്തിലെത്തിക്കഴിഞ്ഞിരിക്കുന്നു.

നഗരകാഴ്ചകള്‍

നഗരകാഴ്ചകള്‍
എങ്ങും ആള്‍ത്തിരക്കു.പെഡെസ്റ്റ് റിയന്‍ ക്രോസിംഗില്‍ ,സിഗ്നല്‍ നോക്കി,റോഡ് മുറിച്ച് കടക്കുന്ന ആളുകള്‍.ഈ തിരക്കിലൂടെ കാര്‍ ഹോട്ടലിനു മുന്നിലെത്തി.

ഇടുക്കി ജില്ല-വണ്ടിപ്പെരിയാര്‍ മൌണ്ട് സത്രം പുല്‍മേടുകളിലൂടെ ഒരു യാത്ര

2011-09-11T06:15:00.000-07:00

ഇടുക്കിയുടെ കാഴ്ചകള്‍ എത്ര വര്‍ണ്ണിച്ചാലും എനിക്കു മതിയാകാറില്ല എന്ന് സുഹൃത്തുക്കള്‍ കളിയാ ക്കാറുണ്ട്.അതില്‍ സത്യമില്ലാതില്ല താനും.പക്ഷെ ഓരോ ഇടുക്കി യാത്രയും എനിക്ക് പുതിയ കാഴ്ചകള്‍ തന്നെയാണു.തൊട്ടടുത്ത ജില്ലക്കാരനായതുമൂലം മിക്കവാറും ഇടുക്കി യാത്രകള്‍ തരമാകാറുമുണ്ട്.അതുപോലൊരു യാത്രയായിരുന്നു ഇതും.എന്നാല്‍ വളരെ അപൂര്‍വ്വമായി മാത്രം ലഭിക്കുന്ന ഒന്നും.

ക്യാമറ പതിവുപോലെ മറന്നു വച്ചു.!!!അതിനാല്‍ മൊബൈല്‍ ചിത്രങ്ങളാണെല്ലാം.

വണ്ടിപ്പെരിയാര്‍ ടൌണില്‍ നിന്നും അരണക്കല്‍ എസ്റ്റേറ്റ് വഴിയുള്ള ഒരു യാത്രയില്‍ പങ്കുകൊള്ളുവാനാണു എനിക്ക് അവസരം സിദ്ധിച്ചത്. വണ്ടിപ്പെരിയാറില്‍ നിന്നും ഏകദേശം 18 കിമി ദൂരമാണു ഈ എസ്റ്റേറ്റ് വഴി മൌണ്ട് സത്രം എന്ന സ്ഥലത്തേക്ക്.പഴയകാല ശബരിമല പാത ഇതിലെയായിരുന്നു.ആദ്യ 5-6 കിമി റോഡ് അടുത്തകാലത്തായി പഞ്ചായത്ത് പുതുക്കിപണിതിട്ടുണ്ട്.പിന്നെയങ്ങോട്ട് റോഡില്ല എന്നു പറയാം.ഊഞ്ഞാലാട്ടം മാത്രം.സത്രം വരെ ജീപ്പ് റോഡുണ്ട്.മണ്ണുറോഡാണെന്നുമാത്രം.നല്ല മഴ തുടങ്ങികഴിഞ്ഞു.മൊബൈല്‍ പുറത്തെടുക്കുവാന്‍ പോലും സാധിക്കാത്ത മഴ.വല്ല വിധേനയും സത്രത്തിലെത്തി.സത്രമായിരുന്ന കെട്ടിടത്തിന്റെ അവശിഷ്ട്ടങ്ങള്‍ മാത്രം.ആ ഭാഗത്ത് മഴയില്ല.

സത്രത്തിന്റെ അവശിഷ്ടങ്ങള്‍

ആ കാണുന്ന മലമുകളില്‍ നിന്നുമാണു പുല്‍മേടിലേക്കുള്ള പരമ്പരാഗത പാത

ഇവിടെനിന്നും 6 കിമി പോയാല്‍ വള്ളക്കടവിലെത്താം.ഗവിറോഡിലുള്ള അതേ സ്ഥലം തന്നെ.അവിടെ നിന്നും 6കിമി പോയി നാലാം മൈല്‍ എന്ന സ്ഥലത്തുനിന്നും തിരിഞ്ഞു 11 കിമി യാത്ര ചെയ്താല്‍ പുല്ലുമേട്.ആ പുല്ലുമേടില്‍നിന്നും,തെക്കു ഭാഗത്തേക്കാണു ശബരിമലയിലേക്കുള്ള നടത്തം തുടങ്ങുന്നത്.പുല്ലുമേടില്‍നിന്നും പടിഞ്ഞാറോട്ട് 6കിമി സഞ്ചരിച്ചാല്‍ മൌണ്ട് സത്രം.ഈ വഴിയാണത്രെ ഇപ്പോള്‍ ശബരിമലക്കുള്ള കാല്‍നടപാതയായി പരിഗണിക്കുന്നത്.
ഈ ഭാഗത്ത് മഴയേയില്ല. കൂടെയുള്ളവര്‍ ഉപ്പുപാറ കാണുവാന്‍ പോയപ്പോള്‍.ഞാനും ഒരു സുഹൃത്തും കൂടി സത്രം പാതയിലൂടെ കുറച്ച്ദൂരം നടക്കാമെന്നു തീരുമാനിച്ചു.മണ്ണു റോഡ് തന്നെ.രണ്ട് വശത്തും പുല്‍മേടുകള്‍ മാത്രം.ഇടക്കിടെ ഷോലവനങ്ങളും.ഒരു 200മി പോയപ്പോള്‍ വനംവകുപ്പിന്റെ ഒരു വാച്ചര്‍ ധൃതിയില്‍ നടന്നു വരുന്നു.ആള്‍ ഞങ്ങളോട് നില്‍ക്കുവാന്‍ ആംഗ്യം കാണിക്കുന്നു.തൊട്ടപ്പുറത്തെ വളവില്‍ ഒരു ഒറ്റയാന്‍ (മോഴ) നിലയുറപ്പിച്ചിരിക്കുന്നു.അതിനു തെളിവെന്നോണം തൊട്ട് മുന്‍പില്‍,ആവിപറക്കുന്ന ആനപിണ്ടവും.ഞങ്ങള്‍ ഏതായാലും വന്നവഴിയേ തിരിച്ചടിച്ചു.

സത്രം റോഡിന്റെ തുടക്കം

തിരികെയെത്തിയപ്പോള്‍ ഉപ്പുപാറയ്ക്ക് പോയവര്‍ മടങ്ങിയെത്തിയിരിക്കുന്നു.ആളുകളെല്ലാം ദൂരേക്ക് കൈ ചൂണ്ടുന്നുമുണ്ട്.അങ്ങ്ദൂരെ ഒരു മലമുകളില്‍ ഒരു ആന നില്‍പ്പുണ്ട്.

ആദ്യത്തെ ആനകാഴ്ച

ഇന്നാദ്യമായി ആനയെക്കണ്ട ആവേശത്തിലായി എല്ലാവരും
വാഹനത്തില്‍ കയറി സത്രം റൂട്ടില്‍ യാത്ര തുടങ്ങി.
പ്രകൃതി ഭംഗി വിവരിക്കുവാന്‍ വയ്യാത്ത വിധം തന്നെ.എങ്ങും പച്ചപരവതാനി മാത്രം.ഇളം തണുപ്പും!

നോക്കെത്താ ദൂരത്തോളം പുല്‍മേടുകള്‍
ക്യാമറ മറന്ന നിമിഷത്തെ ശപിച്ചുകൊണ്ട് മൊബൈല്‍ പുറത്തെടുത്തു.ഉള്ളത്കൊണ്ട്ഓണം പോലെ.

ഒരു ഒറ്റയാന്‍ അങ്ങകലെ മലയില്‍ (ഭൂതക്കണ്ണാടി വേണം കാണണമെങ്കില്‍)

നോക്കെത്താദൂരത്തോളം പച്ച പുതച്ച പുല്‍മേടുകള്‍ മാത്രം.അങ്ങിങ്ങായി ഷോലവനങ്ങള്‍ വേറൊന്നുമില്ല.എല്ലാ മലയിലും ആനകള്‍ ഡസന്‍ കണക്കിനു പുല്ല് മേയുന്നു.ചില മലകളില്‍ ഒറ്റക്കു വിഹരിക്കുന്നവയും.വഴിക്കു കുറുകെ ഒരു പറ്റം കാട്ടുപോത്തുകള്‍ ഓടിമറയുന്നു.വളഞ്ഞും ചെരിഞ്ഞും വാഹനം പതുക്കെ മുന്നോട്ട് നീങ്ങിക്കൊണ്ടിരുന്നു.ഇപ്പോള്‍ വലതു ഭാഗത്തായി ഒരു ഫോറസ്റ്റ് വാച്ച്ടവര്‍ കാണാം,നിര്‍മ്മാണം പൂര്‍ത്തിയായി വരുന്നതേയുള്ളൂ.

വനംവകുപ്പിന്റെ വാച്ച് ടവര്‍

ഇടത്ത് വശത്ത് തൊട്ടടുത്ത് കുറെയധികം മ്ലാവുകള്‍,എല്ലാം അസാമാന്യ വലിപ്പമുള്ളവ.മൊബൈല്‍ ക്യാമറ സെറ്റ് ആക്കിവന്നപ്പോഴേക്കും അതതിന്റെ പാട്ടിനുപോയി.
കുറച്ചുകൂടി മുന്നോട്ട്ചെന്നപ്പോള്‍ ഇനിയും പോകാന്‍ പറ്റാത്തവിധം ചെളിക്കുണ്ടായിരിക്കുന്നു റോഡ്.ഞങ്ങള്‍ക്ക് ഫോര്‍വീല്‍ ഇല്ലാത്തതിനാല്‍ യാത്ര ഇവിടെ അവസാനിപ്പിക്കുകയേ നിര്‍വ്വാഹമുള്ളൂ.

സീതക്കുളം

അങ്ങ് ദൂരെ താഴ്വാരത്ത് സീതക്കുളം കാണാം,സീത കുളിച്ചതെന്നു കരുതപ്പെടുന്ന,മനോഹരമായ ഒരു ജലാശയം. മൊബൈലില്‍,ഉള്ള സെറ്റപ്പില്‍,അതിന്റെ ചിത്രവുമെടുത്ത്,തിരികേ മടങ്ങി.

ഇന്ത്യ-ഉത്തര്‍പ്രദേശ്-ഫത്തേപുര്‍സിക്രി

2011-06-05T08:16:00.000-07:00

ഗോള്‍ഡന്‍ ട്രൈ യാംഗിള്‍ എന്നറിയപ്പെടുന്ന ഡല്‍ഹി-ആഗ്ര-ജെയ്പൂര്‍ റൂട്ടിലുള്ള കാഴ്ചകള്‍ സഞ്ചാരികള്‍ക്ക് എന്നും ഹരമാണല്ലോ.കുറച്ച് വര്‍ഷങ്ങള്‍ക്ക് മുന്‍പ് ഈ റൂട്ടില്‍ സഞ്ചരിചിട്ടുണ്ട്. ഇന്ത്യയുടെ നല്ലൊരു ഭാഗവും ഇനിയും കണ്ട്തീര്‍ത്തിട്ടില്ലെങ്കില്‍ തന്നെയും, ഒരു തവണ കൂടി ഗോള്‍ഡന്‍ ട്രൈ യാംഗിള്‍ യാത്ര ആകാമെന്ന് കരുതി.അങ്ങിനെ ഡല്‍ഹി വഴി ആഗ്രയിലെത്തി.ഒരു ദിവസത്തെ പകല്‍ കാഴ്ചകളില്‍ ഒതുങ്ങുന്നതാണ് സാധാരണ സഞ്ചാരികള്‍ക്ക് ആഗ്ര.ഒരു ദിവസം കൊണ്ട് ആഗ്ര കാഴ്ചകള്‍ കണ്ടു ,ഹോട്ടലില്‍ എത്തി.

രാവിലെ പ്രഭാത ഭക്ഷണത്തിന് ശേഷം പുറത്തേക്കിറങ്ങി.ഇന്ന് വൈകിട്ടോടെ ജയ്പൂരിലെത്തണം.പോകുന്ന വഴിയാണ് വിഖ്യാതമായ ഫത്തെര്‍പൂര്‍ സിക്രി.ആഗ്രയില്‍ നിന്നും ഏതാണ്ട് ഒരു മണിക്കൂര്‍ നേരത്തെ യാത്രയുണ്ട് ഫതെര്‍പൂര്‍ സിക്രിയിലേക്ക്.39 കിമി ദൂരം.രാവിലെ തന്നെ ആഗ്ര തെരുവീഥികള്‍ തിരക്കിന്റെ പിടിയിലായി കഴിഞ്ഞു.

ആഗ്ര തെരുവ്

എങ്ങും ട്രാഫിക് ബ്ലോക്ക്‌.സിഗ്നല്‍ കൂസാതെ തലങ്ങും വിലങ്ങും നീങ്ങുന്ന വാഹനങ്ങള്‍. കുതിരവണ്ടികളും,നാല്‍ക്കാലികളും പുറമേ. ചൂടുകാലം തുടങ്ങിയിരിക്കുന്നു.വാഹനത്തിലെ തെര്‍മോ മീടറില്‍ 36 ഡിഗ്രീ യാണ് ചൂട്. ജൈപൂരിനടുതുള്ള മില്‍കാപൂര്‍സ്വദേശിയായ സുനില്‍ കുമാര്‍ ആണ് വാഹനത്തിന്റെ സാരഥി.നല്ലൊരു ചെറുപ്പക്കാരന്‍.ക്ഷമാപൂര്‍വ്വം എല്ലാ കാര്യങ്ങളും വിശദീകരിച്ചു തരും.സാധാരണ ഉത്തര ഇന്ത്യകാരുറെ അഹംഭാവമൊന്നുമില്ല.ഒരു റെയില്‍ ക്രോസ് കഴിഞ്ഞതോടെ തിരക്ക് തെല്ലൊന്നു ശമിച്ചു.ഇപ്പോള്‍ ഗോതമ്പ് പാടങ്ങളുടെ നടുവിലൂടെയാണ് യാത്ര.കണ്ണെത്താ ദൂരത്തോളം നീണ്ടു കിടക്കുന്ന ഗോതമ്പ് പാടങ്ങള്‍.ഇതിനു നെല്‍ കൃഷിയോളം വെള്ളം വേണ്ടായത്രേ.റോഡരുകില്‍ നിറയെ ഗ്രാന്റിസ് മരങ്ങള്‍.അപൂര്‍വ്വമായി മാവുകളും.

മികച്ച പാതയിലൂടെയാണ് സഞ്ചാരമെങ്കിലും വേഗത 90 കിമി എന്ന പരിധിയില്‍ ആണ്.പലപ്പോഴും അത് 70-80കിമി ആയി താഴുകയും ചെയ്യുന്നു.ഹൈവേയില്‍ പല സ്ഥലങ്ങളിലും ക്യാമറകള്‍ ഒളിപ്പിച്ചിരിക്കുകയാണെന്ന് സുനില്‍ പറഞ്ഞു.ഓവര്‍ സ്പീഡിനു ഫൈന്‍ 5000 രൂപയും!ഇടക്കിടെ ടോള്‍ബൂത്തുകളും അവിടെയെല്ലാം വാഹന നിരകളും.
ജ യ് പൂര്‍ ഹൈവേയില്‍ നിന്നും കാര്‍ ഫത്തേപൂര്‍സിക്രിയിലേക്കുള്ള പാതയിലേക്ക് തിരിഞ്ഞു.കുറെദൂരം മുന്നോട്ടോടി ഒരു പാര്‍ക്കിംഗ് ഏരിയയിലെത്തി.ഇവിടെ നിന്നും ഇനി മിനി ബസ്സില്‍ ആണു യാത്ര.11 മണിയാകുന്നതേയുള്ളുവെങ്കിലും വെയിലിനു ഘനം വച്ചിരിക്കുന്നു.നല്ല ചൂട്.ഏകദേശം 40 ഡിഗ്രീ! ഒരു സീറ്റ് സംഘടിപ്പിച്ചു.അവധിദിവസമായതിനാല്‍ നല്ല തിരക്ക്.കോട്ടയുടെ പ്രവേശനകവാടവും കടന്ന് കോട്ടയുടെ സമീപത്ത് ബസ് നിന്നു.അവിടെ ഗൈഡ് മാന്‍സിംഗ് ടിക്കറ്റുമായി കാത്തു നില്‍ക്കുന്നു.ഇന്ത്യാക്കാര്‍ക്ക് 10 രൂപയാണു നിരക്ക്,വിദേശികള്‍ക്ക് 250രൂപയും!!!.മാന്‍സിംഗ് ഹിന്ദിയില്‍ വിവരണം തുടങ്ങിക്കഴിഞ്ഞു.നമുക്കു ഹിന്ദി കമ്മിയും.അതറിഞ്ഞപ്പോള്‍ ആള്‍ സംസാരം ഇംഗ്ലീഷിലാക്കി. ഹിന്ദിക്കാരുടെ ഇംഗ് ളീഷ് മനസ്സിലാക്കണമെങ്കില്‍ തെല്ലൊന്നുമല്ല ബുദ്ധിമുട്ട്.പേരുകള്‍ പറയുന്നത് പോലും വ്യത്യസ്തമായാണു. ഷാജഹാന്‍ എന്ന് ആശാന്‍ ഉച്ചരിക്കുന്നത് സാസാനെന്നാണു. നമ്മുടെ ഇംഗ്ലീഷ് കേള്‍ക്കുമ്പോള്‍ “ഇവനേതുനാട്ടുകാരനാടാ“ എന്നൊരു ഭാവവും.തെക്കേഇന്ത്യാകാരുടെ മോശം ഇംഗ്ലീഷിനെക്കുറിച്ച് ഒരു തവണ മാന്‍സിംഗ് സൂചിപ്പിക്കുകയും ചെയ്തു!!

കോട്ടവാതില്‍

മുഗള്‍ ചക്രവര്‍ത്തിയായിരുന്ന അക് ബര്‍ 16-)0 നൂറ്റാണ്ടില്‍ നിര്‍മ്മിച്ചതാണീ കോട്ടയും നഗരവും.ഫത്തേപൂര്‍സിക്രി എന്നാല്‍ വിജയത്തിന്റെ നഗരം എന്നാണു അര്‍ത്ഥം.അഫ് ഗാന്‍ ആക്രമണം മൂലവും,വരള്‍ച്ച കൊണ്ടും ഏതാനും വര്‍ഷങ്ങള്‍ക്കു ശേഷം അക് ബര്‍ ഈ നഗരിയെ കയ്യൊഴിഞ്ഞു എന്നാണു ചരിത്രം.സുല്‍ഫി സെയിന്റ് സലീം ചിസ്തിയുടെ അനുഗ്രഹത്തെ തുടര്‍ന്ന് അക് ബറിനൊരു ആണ്‍കുഞ്ഞ് ജനിച്ചെന്നും,അതിനെത്തുടര്‍ന്ന് സന്യാസിവരന്റെ ആഗ്രഹപരകാരമാണു ഈ നഗരത്തിന്റെ നിര്‍മ്മാണം നടത്തിയതെന്നും പറയുന്നു.അതല്ല,ഗുജറാത്ത് പ്രദേശങ്ങള്‍ നിയന്ത്രണത്തിലാക്കാനുള്ള പടയൊരുക്കത്തിനായി നിര്‍മ്മിക്കപ്പെട്ടാതാണിതെന്നും മറ്റൊരു ചരിത്രം.ഹിസ്റ്ററി ഈസ് മിസ്റ്ററി എന്നാണല്ലോ.ദൂരെ നിന്നു തന്നെ പ്രവേശന കവാടം കണ്ടു.
അകത്തേക്ക് പ്രവേശിക്കുമ്പോള്‍ വലിയ ഒരു ഉദ്യാനമാണു ആദ്യം ശ്രദ്ധയില്‍ പെടുന്നത്.ദീവാന്‍-ഇ-ആം എന്ന ഹാള്‍ ഓഫ് പബ്ലിക് ഓഡിയന്‍സിനോടു ചേര്‍ന്നാണീ ഉദ്യാനം.പൊതുജനങ്ങളുടെ പരാതികള്‍ കേട്ടിരുന്നത് ഇവിടെയാണ്.

ദീവാന്‍-ഇ-ആം
പ്രഭുക്കന്മാരേയും നാടുവാഴികളേയും ചക്രവര്‍ത്തി കണ്ടിരുന്ന മന്ദിരമാണു ദീവാന്‍-ഇ-ഖാസ്.ചുമന്ന സാന്‍ഡ് സ്റ്റോണ്‍ കൊണ്ടുള്ള ഒരു വിസ്മയ നിര്‍മ്മിതിയാണീ മന്ദിരം.

ദീവാന്‍-ഇ-ഖാസ്

പഞ്ചമഹല്‍

അഞ്ച് നിലകളില്‍ പടുത്തുയര്‍ത്തിയിരിക്കുന്ന മറ്റൊരു സമുച്ചയമാണു പഞ്ചമഹല്‍.കോട്ടക്ക് പുറത്തായി ദൂരെ ഹിരണ്‍ മീനാര്‍ എന്ന ടവര്‍ കാണാം.ആനകളെകൊണ്ട് കുറ്റവാളികളെ കൊന്നിരുന്നത് ഇവിടെയായിരുന്നത്രെ.

ഹിരണ്‍ മീനാര്‍

വിഖ്യാതനായ സംഗീതഞ്ജന്‍ ടാന്‍സന്‍ സംഗീതപരിപാടികള്‍ നടത്തിരുന്ന മണ്ഡപം

എല്ലായിടവും വിദേശികളുടെ തിരക്കാണ്.അവര്‍ ചരിത്രം എല്ലാം വായിച്ചറിഞ്ഞാണു കാഴ്ചകള്‍ കാണുന്നത്.നമ്മളെപ്പോലെ ഓട്ടപ്രദിക്ഷണക്കാരല്ല.നടന്ന് നടന്ന് അക് ബറിന്റെ രജപുത്ര ഭാര്യയായിരുന്ന ജോധാഭായിയുടെ കൊട്ടാരത്തിലെത്തി.

ജോധാഭായിയുടെ കൊട്ടാരം
ഒരു തണലില്‍ നിന്നു മാന്‍സിംഗിന്റെ വിവരണം കേട്ടുകൊണ്ടിരുന്നപ്പോള്‍ പെട്ടെന്ന് അയാളുടെ ശബ്ദം ക്രമാതീതമായി ഉയരുന്നു. ഉറഞ്ഞു തുള്ളി ആരെയോ ശകാരിക്കുകയാണു വിദ്വാന്‍.കാരണം ബഹുരസം.ഞങ്ങള്‍ക്കു കാര്യങ്ങള്‍ പറഞ്ഞു തരുന്ന സമയത്ത് മറ്റൊരു സംഘം,ഉത്തരേന്ത്യക്കാര്‍,മറഞ്ഞു നിന്നു വിവരണം കേട്ടതാണു ആളെ പ്രകോപിപ്പിച്ചത്.

താപനില സഹിക്കാവുന്നതിനുമപ്പുറത്തായിരിക്കുന്നു.40 ഡിഗ്രിക്ക് മുകളിലാണു ചൂട്.സത്യം പറഞ്ഞാല്‍ എങ്ങിനെയെങ്കിലും ഒന്ന് തിരികെ കാറിലെത്തിയാല്‍ മതിയെന്നായി.പക്ഷെ മാന്‍സിംഗുണ്ടോ വിടുന്നു.തൊട്ടടുത്തുള്ള ജുമാമസ്ജിദ് കാണണമെന്നായി അയാള്‍. ന്യായമായ ദൂരം നടക്കുകയും വേണം.അയാളുടെ പുറകെ നടന്നു.ജുമാമസ്ജിദിലെത്തി, വിശാലമായ ഒരു സ്ഥലത്താണു ഇത് നിലകൊള്ളുന്നത്.റെഡ് സാന്‍ഡ് സ്റ്റോണില്‍ നിര്‍മ്മിച്ച വളരെ വലിയ ഒരു മസ്ജിദ്.

ജുമാമസ്ജിദ്

സുല്‍ഫി സെയിന്റ് സലീം ചിസ്തിയുടെ റ്റോമ്പ്

നടുവിലായി സുല്‍ഫി സെയിന്റ് സലീം ചിസ്തിയുടെ വെള്ളമാ‍ര്‍ബിളില്‍ നിര്‍മ്മിച്ച റ്റോമ്പും സ്ഥിതിചെയ്യുന്നു.ജാതിമതഭേദമന്യെ എല്ലാവരും അതിനകത്ത് പ്രാര്‍ഥിക്കുന്നു.ജുമാ മസ്ജിദിന്റെ പ്രധാന കവാടമായ ബുലണ്ട് ദര്‍വാസ ലോകത്തിലെ തന്നെ ഏറ്റവും വലിയ കവാടമാണെന്നു ഗൈഡ് പറഞ്ഞു. തിരികെ പാര്‍ക്കിങ് ഏരിയയിലെത്തി ആദ്യത്തെ ബസ്സില്‍ താഴെയെത്തി.എല്ലാവരും വെയില്‍ കൊണ്ട് തളര്‍ന്നിരിക്കുന്നു. മാന്‍സിംഗിനോടു യാത്ര പറഞ്ഞു വാഹനത്തില്‍ കയറി. അടുത്ത ലക്ഷ്യമായ ജയ് പൂരിലേക്കു യാത്ര തുടര്‍ന്നു.

ചൈന-ഗ്വങ് ഷോ -പേള്‍ നദികാഴ്ചകള്‍

2011-03-25T05:54:00.000-07:00

2010 ലെ ഏഷ്യൻ ഗെയിംസിനു വേദിയായ ഗ്വാങ്ഷൊ നഗരത്തിലേക്കൊരു യാത്ര എനിക്കു തരമായത് ഏഷ്യൻ ഗെയിംസിനു ശേഷമായിരുന്നു. വളരെ നേരത്തെ തന്നെ നിശ്ചയിച്ചതായിരുന്നു യാത്രയെങ്കിലും,അത് ചൈനയിലേക്കായാതുകൊണ്ട് അവസാന നിമിഷം വരെ ഒരു അനിശ്ചിതത്വം നിലനിന്നിരുന്നു കർശനമായ വിസാ നിയമങ്ങളെക്കുറിച്ചുള്ള സ്നേഹിതരുടെ അറിയിപ്പുകളും എല്ലാം അതിനു കാരണമായിരുന്നു.

തണുത്തുറഞ്ഞ ഒരു ചൈനീസ് പ്രഭാതത്തിലേക്കായിരുന്നു ഞാൻ ചെന്നിറങ്ങിയതെങ്കിലും ഊഷ്മളമായ അനുഭവങ്ങളാൽ ചൈനയെക്കുറിച്ചുള്ള സകല ധാരണകളും തിരുത്തപ്പെട്ടുവെന്നുള്ളതായി യാഥാർത്ഥ്യം.

ഗ്വാങ് ഷൊ വിമാനത്താവളം

സൗഹൃദപൂർവ്വമായി പെരുമാറുന്ന ഇമിഗ്രേഷൻ-കസ്റ്റംസ് ഉദ്യോഗ സ്ഥർ ഇന്ത്യയിലെ എയർപോർട്ടുകളിൽ നിന്നും ചെല്ലുന്നവർക്കു ഒരു പുതിയ അനുഭവമാണു നൽകുന്നത്.

ഗ്വാങ്ഷോവിൽ ചിലവഴിച്ച രണ്ടാഴ്ചക്കാലത്തെ അനുഭവങ്ങളിൽ മറക്കാനാവാത്ത ഒന്നായി പേൾ നദിയിലൂടെയുള്ള നൈറ്റ് ക്രൂയിസ്.

പേൾ നദീതീരത്തെ അനന്തമായ നടപ്പാത

രാത്രി എട്ടരക്കുള്ള ഒരു ട്രിപ്പായിരുന്നു ഞങ്ങൾക്കു വേണ്ടി ബുക്ക് ചെയ്യപ്പെട്ടിരുന്നത്. സമയത്ത് തന്നെ ഷിപ്പ് എത്തി. അവസാന ട്രിപ്പുകളിലൊന്നായതു കൊണ്ടാവണം വലിയ തിരക്കില്ല.കാഴ്ചകൾ കാണുവാൻ നല്ലത് അപ്പർ ഡെക്കായതു കൊണ്ട് നേരെ മുകളിലേക്ക്കയറി. മുകളിലേക്ക് കയറുമ്പോൾ തന്നെ തണുപ്പ് അസഹ്യമായി തുടങ്ങി.6 ഡിഗ്രീയാണു അപ്പോൾ അവിടത്തെ താപനില.തെർമൽ വൂളിനൊന്നും തണുപ്പ് താങ്ങാനാവുന്നില്ല.ക്രൂയിസ് സഞ്ചാരം തുടങ്ങിയപ്പോൾ തണുപ്പ് വീണ്ടും രൂക്ഷമായി.പക്ഷെ തുടർന്നങ്ങോടുള്ള കാഴ്ചകളുടെ മനോഹാരിതയിൽ തണുപ്പ് അറിഞ്ഞില്ലായെന്നുള്ളതാണു സത്യം.ആ കാഴ്ചകളിൽ ചിലത് ഇവിടെ പങ്ക് വയ്ക്കുന്നു

രാത്രികാല ശ്യങ്ങൾ

ക്രൂയിസ് ഷെഡ്യൂൾ

സഞ്ചാരികളുമായി നീങ്ങുന്ന ലക്ഷ്വറി ക്രൂയിസ്

ഡെക്കിൽ നിന്നുമുള്ള കാഴ്ചകൾ

ഗ്വാങ്-ഷൊ ടവർ-പല നിറങ്ങളിലുള്ള ലൈറ്റിംഗ് മനോഹരമാക്കുന്നു

പേൾനദിക്കു കുറുകെയുള്ള പാലങ്ങൾ

ചൈനയിലെ മൂന്നാമത്തെ നീളം കൂടിയ നദിയായ പേൾ നദിക്കു കുറുകെ,ഗ്വാങ് ഷൊ നഗരത്തിൽ ,പത്തോളം പലങ്ങളുണ്ട്.ഇതിൽ നാലെണ്ണം പുതിയതായി നിർമിക്കപ്പെട്ടവയാണു.ഈ പാലങ്ങളിൽ നിന്നും,സമീപത്തുള്ള ബഹുനില ഹോട്ടലുകളിൽ നിന്നുമുള്ള രാത്രികാല നിയോൺ-ലേസർ ലൈറ്റുകളാണു ഈ യാത്രയുടെ ഏറ്റവും വലിയ ആകർഷണംഈ കെട്ടിടങ്ങളെല്ലാം ഏഷ്യൻ ഗെയിംസിനായി നവീകരിക്കപ്പെട്ടവയാണു.കുറച്ച് കൂടി മുന്നോട്ട് പോയപ്പോൾ ക്രൂയിസിലെ സ്റ്റ്യുവാർഡ് വന്നു ദൂരെ ഒരു സ്റ്റേഡിയം ചൂണ്ടിക്കാണിച്ച് തന്നു.

ഏഷ്യൻ ഗെയിംസ് ഉദ്ഘാടന ചടങ്ങുകൾ നടന്ന വേദി

നടപ്പാതയിലൂടെ നടന്നു നീങ്ങുന്ന പഴകച്ചവടക്കാരൻ

ഏഷ്യൻ ഗെയിംസ് ഉദ്ഘാടനം നടന്ന വേദിയാണത്. തണുപ്പ് അസഹ്യമായപ്പോൾ ഈ തണുപ്പൊന്നും ഒരു തണുപ്പല്ല എന്നു സഹജ മലയാളി സ്വഭാവത്തിൽ പറഞ്ഞിരുന്നവരൊക്കെ മെല്ലെ താഴേക്കിറങ്ങി,ഭക്ഷണത്തിനെന്ന വ്യാജേന.അതെന്തായാലും ഒന്നര മണിക്കൂർ നീണ്ട ഈ യാത്രയിൽ നല്ലൊരു രാത്രിഭക്ഷണവും ലഭിച്ചു.

( വിശദമായ ഒരു യാത്രാവിവരണം എഴുതണമെന്നുണ്ട്)

ശബരിമല പുല്ലുമേട് ദുരന്തം

2011-01-16T05:17:00.000-08:00

ഇത് സഞ്ചാരത്തിനിടയിലെ കാഴ്ചകള്‍ ആണെന്നെനിക്കു തോന്നുന്നില്ല.കാണുവാന്‍ രസകരമായ കാഴ്ചകളുമല്ല.പക്ഷെ അവിടെ ഉണ്ടായ അത്യാഹിതത്തിന്റെ ചില ചിത്രങ്ങള്‍ ഒന്ന് പോസ്റ്റ് ചെയ്യണമെന്നു തോന്നി.

പുല്ലുമേടിലേക്കുള്ള കാനനപാത

ഇന്നലെ കുമളി-വണ്ടിപ്പെരിയാര്‍ ഭാഗങ്ങളില്‍ ഉണ്ടായിരുന്നത് കൊണ്ട്,ഈ വാര്‍ത്ത അറിഞ്ഞ ഉടനെ ഒരു ഫോര്‍വീല്‍ വാഹനം സംഘടിപ്പിച്ച് അങ്ങോട്ടേക്ക് തിരിച്ചു.പ്രത്യേക അനുമതിയോടെ മാത്രമെ അവിടം സന്ദര്‍ശിക്കുവാന്‍ സാധിക്കുകയുള്ളൂ.

പുല്ലുമേട്-ഒരു കാഴ്ച

വണ്ടിപ്പെരിയാര്‍ കക്കികവലയില്‍ നിന്നും ഗവി റോഡില്‍ ഏകദേശം 14 കിമി പോയാല്‍ നാലാം മൈല്‍ എത്തി.അവിടെ നിറയെ പോലീസുകാരുണ്ട്.അവിടെ നിന്നും വലത്തൊട്ടു 11 കിലോമീറ്ററോളം യാത്ര ചെയ്താല്‍ പുല്ലുമേട് പ്രദേശം.പുല്ലുമേടിന്റെ തെക്കേ അതിര്‍ത്തിയാണു ഉപ്പുപാറ.

അങ്ങ് ദൂരെ മലയുടെ അതിരില്‍നിന്നുമാണു ശബരിമലയിലേക്കുള്ള ഇറക്കം തുടങ്ങുന്നത്

അവിടെ നിന്നുമാണു ശബരിമലയിലേക്കുള്ള ഇറക്കം(6കിമി)ആരംഭിക്കുന്നത്. ഇങ്ങനെ ഒരു ദുരന്തം സംഭവിക്കുവാന്‍ യാതൊരുവിധ സാധ്യതയുമുള്ള പ്രദേശമല്ല പുല്ലുമേട് എന്നു അവിടെയെത്തുന്ന ഏതൊരാള്‍ക്കും മനസ്സിലാകും.ഒട്ടുമുക്കാല്‍ ഭാഗവും നിരപ്പായ ഒരു സ്ഥലം.നമ്മുടെ സംവിധാനങ്ങളുടെ അപര്യാപ്തത ഒന്നുകൊണ്ടു മാത്രമാണു ഈ ദുരന്തം.
വിശാലമായ വഴിയിലൂടെ ദര്‍ശനം കഴിഞ്ഞ് തിങ്ങി നിറഞ്ഞു വരുന്ന ആളുകള്‍ പെട്ടെന്ന് ഇതേപാതയില്‍. ഒരു ബോട്ടില്‍ നെക്കിലേക്കു എത്തിപ്പെടുന്നു.

പാത ഇടുങ്ങിയതായി മാറുന്നു

കാരണം ഇരുവശവും താല്‍ക്കാലിക കടകള്‍ നിറഞ്ഞ ഇവിടെ 12 അടി മാത്രമാണു റോഡിനു വീതി,അവിടെ മുതല്‍ ചെറിയ ഒരു ഇറക്കവും.പിന്നീടുള്ള ഒരു 15 മീറ്റര്‍നീളത്തില്‍ ആണു ഈ അത്യാഹിതം സംഭവിച്ചത്.

ചെറിയ ഒരിറക്കം

ഈ ഇരുമ്പ് ചാനലിലൂടെയാണു വാഹനങ്ങള്‍ തടയാനുള്ള ചങ്ങല ഇട്ടിരുന്നത്

കാടായ കാട്ടിലെല്ലാം സോളാര്‍ ലൈറ്റ് വൈക്കുന്ന വനംവകുപ്പുകാര്‍ ഇവിടെ പേരിനു പോലും ഒരു ലൈറ്റ് വച്ചതായി കണ്ടില്ല.കടകളില്‍ നിന്നുമുണ്ടായിരുന്ന പെട്രോള്‍മാക്സ് വെളിച്ചം മാത്രമാണു അന്നുണ്ടായിരുന്നത്.

ഏറ്റവും അപകടകരമായി നിന്നിരുന്നത് റോഡീനു ഒത്തനടുവില്‍ കണ്ട ഒരു ഇരുമ്പ് ചാനലാണു.റോഡിനു കുറുകെ ഉണ്ടായിരുന്ന ചങ്ങല ഈ ഇരുമ്പ് ചാനലിനുള്ളിലൂടെയാണു ഇട്ടിരുന്നത്.
ഒരു തരി വെളിച്ചം പോലുമില്ലാതെ, ഈ ഇടുങ്ങിയ പാ‍ത തിങ്ങിനിറഞ്ഞ്, ആയിരങ്ങള്‍ നല്ല വേഗതയില്‍ വരുന്നു.ചങ്ങലയിലും,ഇരുമ്പ് കുറ്റിയിലും തട്ടി മുന്‍ നിരക്കാര്‍ താഴെ വീഴുന്നു,അവരെ ചവിട്ടി മെതിച്ച് പതിനായിരങ്ങള്‍ കടന്നു പോകുന്നു!!വെറും പതിനഞ്ച്-ഇരുപത് മീറ്റര്‍ നീളം സ്ഥലത്താണു ഇത് സംഭവിച്ചതെന്ന് പറയുന്നു!

കുറ്റാകൂരിരുട്ടില്‍ ചങ്ങലയില്‍ തട്ടി വീണ നൂറുകണക്കിനാളുകളുടെ ശരീരം തുളച്ചത് ഈ ചാനലും.ഇപ്പോഴും അത് മാറ്റിയിട്ടില്ല!!!

അപകടത്തിനിരയായവരുടെ സാധന സാമഗ്രികളുടെ ഹൃദയഭേദകമായ കാഴ്ച
അന്വേഷണ കമ്മീഷനും,അന്വേഷണങ്ങളും എന്തെല്ലാം കണ്ടെത്തലുകള്‍ നടത്തിയാലും അത്യവശ്യം വെളിച്ചവും,ബലവത്തായ പൈപ്പ് വേലിയും,കുറച്ച് സുരക്ഷാ ഉദ്യോഗസ്ഥരും ഈ സ്ഥലത്തുണ്ടായിരുന്നെങ്കില്‍ ഒരിക്കലും ഉണ്ടാകുമായിരുന്നില്ല അതി ദാരുണമായ ഈ ദുരന്തം എന്ന് ഉറപ്പിച്ച് പറയാന്‍ കഴിയും.
ഉണ്ടെന്ന് പറയപ്പെടുന്ന എട്ടോ പത്തോ കടുവകള്‍ക്കായി ,കോടിക്കണക്കിനു രൂപ പലപ്രോജക്റ്റുകളില്‍ ചിലവഴിക്കുമ്പോഴും ,ഒരു മരം പോലുമില്ലാത്ത ഇവിടെ ഇനിയെങ്കിലും മനുഷ്യജീവന്‍ ഹോമിക്കപ്പെടാതിരിക്കുവാനുള്ള, അടിസ്ഥാന സൌകര്യങ്ങള്‍ ഒരുക്കാനുള്ള വനംവകുപ്പിന്റെ വിമുഖത മാറിയേതീരൂ. കാലഹണപ്പെട്ട നിയമങ്ങളാണു കാരണമെങ്കില്‍ , ശബരിമല എന്ന യാഥാര്‍ത്ഥ്യം ഉള്‍ക്കൊണ്ടുകൊണ്ടുള്ള നിയമങ്ങളുടെ പൊളിച്ചെഴുത്തും....

കര്‍ണ്ണാടക- കൂര്‍ഗ്-മടിക്കേരി രാജാസ് സീറ്റ്

2010-09-09T22:24:00.000-07:00

മഴ മാറിനിന്ന ഒരു സന്ധ്യയിലാണു മടികേരി പട്ടണത്തിലെത്തുന്നത്.കൂര്‍ഗ്(കൊടഗ്) ജില്ലയുടെ ആസ്ഥാനമായ മടികേരിയിലെത്തുമ്പോള്‍ മഞ്ഞ് പരന്ന് തുടങ്ങിയിരുന്നു. സുഖകരമായ തണുപ്പ്.

പ്രസിദ്ധമായ രാജാസ് സീറ്റിലൊന്നു പോയി,കുറച്ച് നേരം ആ പാര്‍ക്കിലിരുന്നു.മഴകാലമായതുകൊണ്ടാവാം,അധികം ആള്‍ തിരക്കില്ല.

കൊടഗ് രാജക്കന്മാര്‍ നൃത്ത സംഗീത സായാഹ്നങ്ങള്‍ ആസ്വദിച്ചിരുന്ന ഇടമാണല്ലോ ഇവിടം.

മനോഹരമായ സൂര്യാസ്തമന കാഴ്ചകള്‍ ആണു ഇവിടെ നിന്നുമുള്ളത്.ഫോട്ടോഗ്രാഫിയില്‍ പ്രാവീണ്യക്കുറവ് കൊണ്ടും,ക്യാമറയുടെ പരിമിതികള്‍ കൊണ്ടും ചിത്രങ്ങള്‍ “സാദാ”“

മഞ്ഞിന്‍ പുതപ്പണിഞ്ഞ കൊടഗന്‍ താഴ്വാരങ്ങള്‍

സിംഗപ്പൂര്‍ ഫ്ലയര്‍

2010-07-31T23:17:00.000-07:00

നാട്ടില്‍ നിന്നും യാത്ര തിരിക്കുന്നതിനു മുന്‍പ് തന്നെ,സിങ്കപ്പൂരിലെത്തിയാല്‍ നിശ്ചയമായും കൊണ്ട്പോകണം എന്ന് കുട്ടികള്‍ പറഞ്ഞുറപ്പിച്ചിരുന്ന ഒരു പരിപാടിയായിരുന്നു സിങ്കപ്പൂര്‍ ഫ്ലയര്‍ എന്ന ജയന്റ്വീല്‍ സന്ദര്‍ശനം.നേരത്തെ പോയികണ്ടവര്‍ പറഞ്ഞ് പിരികയറ്റിയ ഒരു സംഭവം എന്നായിരുന്നു എന്റെ ധാരണയും.

സിങ്കപ്പൂര്‍ ഫ്ലയര്‍

എത്തിയപ്പോള്‍ തന്നെ ടൂര്‍ഗൈഡിനോട് പറഞ്ഞ് അവര്‍ ടിക്കറ്റും സംഘടിപ്പിച്ചു.രാവിലെ തന്നെ അവിടെയെത്തി.
നാട്ടിലെ ജയന്റ്വീലില്‍ കയറിയ അനുഭവം വച്ച്, ദൂരെനിന്ന് കണ്ടപ്പോള്‍ തന്നെ തലകറക്കം എന്ന പേരു പറഞ്ഞ് ഭാര്യ ഒഴിവായി.പക്ഷെ അടുത്ത് ചെന്നപ്പോഴാണു അവനല്ല ഇവന്‍ എന്നും,എല്ലാവര്‍ക്കും ആസ്വദിക്കാവുന്നതാണെന്നും പിടികിട്ടിയത്.

ക്യാപ്സൂളില്‍ നിന്നുമുള്ള ദൃശ്യങ്ങള്‍

ഏതാണ്ട് 165 മീ ഉയരമുള്ള,2008-ല്‍ നിര്‍മ്മാണം പൂര്‍ത്തിയായ, ഒബ്സെര്‍വേഷന്‍ വീല്‍ ആണു ഈ ഫ്ലയര്‍.ലണ്ടന്‍ ഐ യെക്കാളും 30മീ ഉയരക്കൂടുതല്‍ ഇവര്‍ അവകാശപ്പെടുന്നു.7മിx4മി സൈസുള്ള ക്യാപ്സ്യൂളുകളില്‍ ആണു നമ്മള്‍ കയറുന്നത്.

300 സ്ക്വയര്‍ ഫീറ്റ് ഏരിയയുള്ള ക്യാപ്സൂളിനകവശം
വളരെ സാവകാശം നീങ്ങുന്ന,വിശാലമായ ക്യാപ്സ്യൂളുകള്‍ പൂര്‍ണ്ണമായും എയര്‍കണ്ടീഷന്‍ഡ് ആണു.28ആളുകള്‍ക്ക് ഇതില്‍ ഒരു സമയം കയറാമത്രെ.ഒരു സെക്കണ്ടില്‍ മുക്കാല്‍ അടി എന്ന വളരെ സാവധാനമായിട്ടുള്ള സ്പീഡ് ആണു ഇതിനുള്ളത്.കറങ്ങികൊണ്ടിരിക്കുന്നു എന്നൊരു തോന്നലേ നമ്മള്‍ക്കുണ്ടാകുന്നില്ല.പൂര്‍ണ്ണസുരക്ഷിതത്വമാണു അനുഭവപ്പെടുന്നതും.

തലകറക്കം പറഞ്ഞ് ഒഴിവായവരൊക്കെ മുന്‍പന്തിയില്‍ തന്നെ ചാടിക്കയറി.ക്യാപ്സ്യൂള്‍ മെല്ലെ ചലിച്ചു തുടങ്ങി.കൂട്ടികളും,മുതിര്‍ന്നവരുമെല്ലാം ആവേശത്തിലാണു. താഴെയുള്ള പാര്‍ക്കിംഗ് ഏരിയയാണു നമുക്ക് ആദ്യം ദൃശ്യമാകുന്നത്.തുടര്‍ന്ന് എഫ്-1 ട്രാക്കും,വിശാലമായ മേല്‍പ്പാലങ്ങളും കണ്ട് തുടങ്ങി. ഇവിടെനിന്നുമുള്ള കാഴ്ചകള്‍ വര്‍ണ്ണനാതീതമാണു.ദൂരെ ദൃശ്യമാകുന്ന മറീനയും,അംബരചുംബികളും.6-8 ലയിന്‍ ട്രാഫിക്കുള്ള റോഡുകള്‍.

ക്യാപ്സ്യൂളില്‍ നിന്നുള്ള കാഴ്ചകള്‍

ക്യാപ്സ്യൂളില്‍ നിന്നുള്ള കാഴ്ചകള്‍

ക്യാപ്സ്യൂള്‍ പരമാവധി ഉയരത്തിലെത്തിക്കഴിഞ്ഞു.നല്ല തെളിഞ്ഞ അന്തരീക്ഷത്തില്‍, 45കിമി അകലെയുള്ള കാഴ്ചകള്‍ പോലും കാണുവാന്‍ സാധിക്കും.മലേഷ്യ,ഇന്തോനേഷ്യ എന്നീ രാജ്യങ്ങളുടെ ഭാഗങ്ങളും ദൂരെ നിന്നും കാണാം.ക്യാപ്സ്യൂള്‍ താഴ്ന്നു തുടങ്ങിയപ്പോഴേക്കും കാഴ്ചകള്‍ തീരാന്‍ പോകുന്നുവല്ലോ എന്നായി വിഷമം. ഏതായാലും,ഏതൊരു സിങ്കപ്പൂര്‍ യാത്രികനും ഒഴിവാക്കാനാവാത്ത,കൊടുക്കുന്ന കാശ് മുതലാകുന്ന ഒരു അനുഭവം തന്നെയാണു,240 മില്ല്യണ്‍ സി. ഡോളര്‍ ചിലവില്‍ നിര്‍മ്മിച്ചിരിക്കുന്ന,ഈ വിസ്മയം

എ ഫമൊസ റിസോര്‍ട്ട് ‌‌- മലേഷ്യ

2010-07-01T04:41:00.000-07:00

മലേഷ്യയുടെ തലസ്ഥാനമായ കുലലംപൂരില്‍ നിന്നും ,നോര്‍ത്ത്-സൌത്ത് എക്സ്പ്രസ് വേയിലൂടെ ഒരു മണിക്കൂര്‍ യാത്ര ചെയ്‌താല്‍ ലോകപ്രസിദ്ധ വിനോദ കേന്ദ്രമായ എ ഫമോസ റിസോര്‍ട്ടില്‍ എത്താം .
എ ഫമോസ എന്ന പോര്‍ച്ചുഗീസ് വാക്കിനു,ദി ഗേറ്റ് എന്നാണു അര്‍ഥം.ഇതിനു സമീപമുള്ള മലാക്ക നഗരം ഒരു പോര്‍ച്ചുഗീസ് കോളനി ആയിരുന്നുവല്ലോ.

     മുന്‍ ഭാഗത്തെ കവാടം
ഒരാള്‍ക്ക്‌ 59 മലേഷ്യന്‍ റിന്ഗ്ഗിറ്റ്(ഏകദേശം 825 രൂപ ) ടിക്കറ്റ് നിരക്ക്.ടിക്കറ്റെടുത്ത് ഉള്ളില്‍ കടന്നു.
സകുടുംബം ഉല്ലസിക്കുവാനുള്ള നിരവധി വിനോദോപാധികള്‍ ഈ റിസോര്‍ട്ടില്‍ ഉണ്ട്.
ഒരു പകല്‍ മുഴുവന്‍ ചിലവഴിക്കാന്‍ ഉതകുന്ന വിധത്തില്‍ ആണ് ഈ റിസോര്‍ട്ട് രൂപകല്‍പന ചെയ്തിരിക്കുന്നത്.പക്ഷെ ഓരോന്നിനും,പ്രത്യേകം ചാര്‍ജ് നല്‍കണമെന്ന് മാത്രം.തിരിച്ചിറങ്ങുമ്പോള്‍ നമ്മുടെ പോക്കറ്റ് കാലിയാകുന്ന വിധത്തില്‍ ആണ് എല്ലാം സജ്ജീകരിച്ചിരിക്കുന്നത്. സൂവനീര്‍ ഷോപ്പുകളിലെല്ലാം പൊള്ളുന്ന വില.

1300 ഏക്കര്‍ വിസ്തൃതിയില്‍ സ്ഥിതി ചെയ്യുന്ന ഈ റിസോര്‍ട്ടില്‍   ,ആനിമല്‍ വേള്‍ഡ് ,വാട്ടര്‍ തീം പാര്‍ക്ക്,കോ ബോയ്‌ ടൌന്‍ ,ഗോള്‍ഫ് കോഴ്സ് എന്നിങ്ങനെ നിരവധിവിഭാഗങ്ങളുണ്ട്.കൂടാതെഹോട്ടലുകള്‍,കൊണ്ടോമ്നിയമുകള്‍,ബംഗ്ലാവുകള്‍,ഡിസ്ക്കോ ക്ലബ്ബുകള്‍ അങ്ങിനെ അങ്ങിനെ വേറെയും

കുട്ടികളെ ആകര്‍ഷിച്ചു,കാശ് പിടുങ്ങാന്‍ ഇവര്‍ക്ക് പ്രത്യേക വൈഭവമാണ്.കയറിയ ഉടനെ ഒരുത്തന്‍ വന്നു കുട്ടികളെ ആദിവാസി തലപ്പാവുംധരിപ്പിച്ചു ,കുന്തവും പിടിപ്പിച്ചു. ഫോട്ടോയും എടുത്തു കഴിഞ്ഞു.!(അരുണ്‍ കായംകുളം പറഞ്ഞത് പോലെ 350 രൂപ സ്വാഹ!! ) .അടുത്ത വാതില്‍ക്കല്‍ മലമ്പാമ്പിനെ കഴുത്തില്‍ ഇടാന്‍ തയ്യാറായി മറ്റൊരുവന്‍,അവിടെയും സ്വാഹ!

കുറച്ചു മാറി ആനകളുടെ അഭ്യാസം നടക്കുന്നു.ആനപ്പുറത്ത് കയറാന്‍ തിരക്ക് കൂട്ടുന്ന വിദേശികള്‍.ആവശ്യം ഉയരുന്നതിന് മുന്‍പേ പതുക്കെ അവിടന്ന് വലിഞ്ഞു.ആളൊന്നിനു വെറും 700 രൂപ!

ആനപന്തി
ഒരു മരത്തിന്റെ പ്ലാറ്റ്ഫോമില്‍ ,പുറമേ നിന്നും കാണുവാന്‍ സാധിക്കാത്ത ഒരു ചങ്ങലയില്‍ ബന്ധിച്ചു,കിടത്തിയിരിക്കുന്ന കൂറ്റന്‍ കടുവയോടു ചേര്‍ന്നു നിന്നു ചിത്രമെടുക്കുവാനും,അതിനെ കെട്ടിപ്പിടിക്കുവാനുമുള്ള അവസരവും ഇവിടെ ഉണ്ട്.ഇത് കുട്ടികളെ തെല്ലു ഭയപ്പെടുത്തുക തന്നെ ചെയ്യും.പക്ഷെ അതിനും"സ്വാഹക്ക് "കുറവില്ല. കടുവയെ കണ്ട മാത്രയില്‍ തന്നെ കുട്ടികള്‍ ചാടിക്കയറി സമീപത്ത് ഇരുന്നു. പടം എടുക്കാമെന്ന് വച്ചാലോ ,നമ്മുടെ ഫോട്ടോ പിടുത്തം അവരൊട്ടു സമ്മതിക്കുകയുമില്ല.എന്നിരുന്നാലും അത് ഒരനുഭവം തന്നെ!ഈ കടുവകളെയൊക്കെ drugged ആക്കിയിരിക്കുകയാണെന്നൊരു സംസാരവും പിന്നീട് കേട്ടു.

ഇന്ത്യക്കാരായ സഞ്ചാരികളെ ഇവിടെ അധികം കാണുവാന്‍ സാധിച്ചില്ല.പക്ഷെ സൂവനീര്‍ ഷോപ്പുകളിലും,കാഫെറെറിയകളിലും എല്ലാം സെയില്‍സ് ഗേളുകള്‍ തമിഴ് വംശജരാണ്‌.ഞങ്ങള്‍ കയറിയ ഷോപ്പിലെ രൂപിണി എന്ന പെണ്‍കുട്ടിയുടെ മുന്‍ തലമുറ ട്രിച്ചിയില്‍ നിന്നും കുടിയേറിയവരാണ്.
ഇന്ത്യന്‍ സിനിമകള്‍,പ്രത്യേകിച് തമിഴ് സിനിമകള്‍ , ധാരാളമായി ഇവിടെ ചിത്രീകരിച്ചിട്ടുണ്ട്.
അപ്പോഴേക്കും,ആനിമല്‍ ഷോ ക്കുള്ള സമയമായി.ഇതിനു പ്രത്യേകം ചാര്‍ജ് ഇല്ല!പന്ത് കളിക്കുന്ന ഈലും,ഒറാങ്ങ്- ഒടാങ്ങും ,കരടിയും എല്ലാം ചേര്‍ന്നുള്ള ഒരു ഷോ.ഇത്രയും മൃഗങ്ങളെ കണ്ടപ്പോഴേക്കും കുട്ടികള്‍ക്ക് ആവേശമായി,ഞങ്ങള്‍ക്ക് ചെറിയ വിശ്രമവും.

ആനിമല്‍ ഷോ

താമസിക്കുവാനുള്ള വില്ലകളും,ഹോട്ടലുകളും

ഏതു തരത്തില്‍ ഉള്ള സഞ്ചാരിക്കും ഇണങ്ങുന്ന ബജടിലുള്ള താമസ സൌകര്യം ഇവിടെ ലഭ്യമാണ് .പുറമേ നിന്നുമുള്ള ഭക്ഷണ സാമഗ്രികള്‍ അനുവദനീയമല്ലെങ്ങിലും മലയാളിയുടെ തനിസ്വഭാവം മൂലം കുറച്ചു ഭക്ഷണപാനീയങ്ങള്‍ അകത്തു കടത്തി.പിന്നാലെ വന്ന സെക്യൂരിറ്റി ഗാര്‍ഡ് കയ്യോടെ എന്റെ ബാക്ക് പായ്ക്ക് റിസപ്ഷനിലെത്തിച്ചു തന്നു!അകത്തു ഭക്ഷണത്തിന് തീ വിലയും!ഒരു പെപ്സിക്ക് 110 രൂപ എന്ന നിലയിലാണ് കാര്യങ്ങള്‍.
വേറെയും കാഴ്ചകള്‍ നിരവധിയുണ്ട്. ആനിമല്‍ സഫാരി ആണ് ഇതില്‍ ഏറ്റവും പ്രധാനം.വണ്ടിക്കകത്തു സുരക്ഷിതമായി ഇരുന്നു വന്യ മൃഗങ്ങളെ വളരെ അടുത്തു കാണുവാനുള്ള സൌകര്യം ഉണ്ട്.ഉച്ച ഭക്ഷണത്തിന് ശേഷം സഫാരിക്കായി പുറപ്പെട്ടു.

. ആനിമല്‍ സഫാരി
ഇവിടത്തെ ഏറ്റവും നല്ല,കൊടുത്ത കാശ് മുതലാകുന്ന,പരിപാടി ആനിമല്‍ സഫാരി ആണ്.തുറസ്സായ,വിശാലമായ സ്ഥലത്ത് സ്വച്ഛന്ദം വിഹരിക്കുന്ന സിംഹം,കടുവ,കഴുതപ്പുലി തുടങ്ങിയവയെ അടുത്തു കാണാം.ഞങ്ങള്‍ ചെല്ലുമ്പോള്‍ മൃഗരാജനടക്കമുള്ളവര്‍ ഉച്ച മയക്കത്തിലായിരുന്നു.കുട്ടികള്‍ക്ക് ഇതൊരു നല്ല വിരുന്നായി.ബന്നാര്‍ഘട്ടയിലതിനേക്കാള്‍ നന്നായി ഇവയെല്ലാം ഇവിടെ സംരക്ഷിക്കപ്പെട്ടിരിക്കുന്നു.

നമ്മുടെ മൃഗശാലയില്‍ കണാറില്ലാത്ത മലയന്‍ ടാപിര്‍ എന്ന വിചിത്ര ജീവിയും,ഇവിടത്തെ അന്തേവാസിയാണ്.

മലയന്‍ ടപിര്‍

വൈകുന്നേരമാകുന്നു.എ ഫമോസയില്‍ നിന്നും പുറത്തിറങ്ങി. ചരിത്ര നഗരമായ മലാക്കയിലേക്ക് ഇവിടെനിന്നും 30 മിനിറ്റ് യാത്ര മാത്രമേയുള്ളൂ.മലേഷ്യന്‍ ഗ്രാമങ്ങളിലൂടെയാണ്,അങ്ങോടുള്ള റോഡ്‌ കടന്നു പോകുന്നത്.

കേരളത്തെ അനുസ്മരിപ്പിക്കുന്ന ഭൂപ്രകൃതിയാണ് ഈ ഭാഗങ്ങളില്‍.

കാലാവസ്ഥയും സമാനം.നല്ല ഭംഗിയാര്‍ന്ന വീടുകള്‍.തെങ്ങും മാവും എല്ലാം സമൃദ്ധമായി വളരുന്നു. കുറച്ചകലെ റബ്ബര്‍ തോട്ടങ്ങളും ധാരാളമായി കാണാം.കുട്ടികള്‍ ഉള്‍പ്പെടെ എല്ലാവരും മയക്കത്തിലാണ്.മലാക്ക ലക്ഷ്യമാക്കി ഞങ്ങളുടെ വാഹനം നീങ്ങി കൊണ്ടിരുന്നു.

മലപ്പുറം ജില്ലയിലെ ലോകകപ്പ് കാഴ്ചകള്‍

2010-06-03T02:59:00.000-07:00

കഴിഞ്ഞ ദിവസം കോട്ടക്കല്‍ നിന്നും,മലപ്പുറം വഴി നിലമ്പൂര്‍ വരെ പോയപ്പോഴാണ് മലബാറുകാരുടെ ഫുട്ബോള്‍ കമ്പത്തിന്റെ ഒരു ഏകദേശ ചിത്രം പിടി കിട്ടിയത്. എറണാകുളം ജില്ലക്കാരനായ എനിക്ക് അന്യമായ ഒരു ഫുട്ബോള്‍ സംസ്കാരം ആണ് അവിടെ കാണാന്‍ കഴിഞ്ഞത്.

റോഡിലുടനീളം ലോക കപ്പില്‍ പങ്കെടുക്കുന്ന ടീമുകളുടെ കൂറ്റന്‍ ഫ്ലക്സ് ചിത്രങ്ങള്‍ . ബ്രസ്സീലിനും , അര്‍ജന്റിനക്കും ആണ് ആരാധകരേറെയും.കൂട്ടത്തില്‍ സ്പെയിനിനും, ഇംഗ്ലണ്ടിനും,ഫ്രാന്‍സിനും ആളുണ്ട്.പക്ഷെ മറ്റു രാജ്യക്കാര്‍ക്ക് ഡിമാണ്ട് അത്ര പോര.

ബ്രസീല്‍ ബ്രസീല്‍ എല്ലാം ബ്രസീല്‍ മയം.

അര്‍ജന്റീനയും മോശമല്ല

സ്പെയിനിനും ആളുണ്ടേ!!

ഫ്രാന്‍സ് ഫാന്‍സും മോശക്കാരല്ല
മതിലിന്റെ മുകളിലെല്ലാം ഫ്ലക്സ് ബോര്‍ഡുകള്‍ .ബോര്‍ഡിലെ വാചക കസര്‍ത്തുകളും,വെല്ലുവിളികളും ആരാധനയുടെ ആഴം വ്യക്തമാക്കുന്നു. ഓട്ടോ റിക്ഷയുടെ പുറകില്‍ വരെ ഫുട് ബോള്‍ വാഗ്വാദങ്ങള്‍ ആണ്.ലോക കപ്പു വിശേഷം പിന്നില്‍ എഴുതിയിരിക്കുന്ന ഒരു ഓട്ടോ യുടെ പുറകെ ഞാന്‍ വച്ച് പിടിച്ചു.അത് നിര്‍ത്തിയ തക്കത്തിന് ഒരു ചിത്രവുമെടുത്തു.രസകരമായ പിന്‍ കുറിപ്പ് ഒന്ന് വായിച്ചു നോക്കൂ.

ആയിരം മെസ്സിക്ക് അര കക്കാ!!!
റോഡിനു കുറുകെ വിവിധ രാജ്യങ്ങളുടെ പതാക വലിച്ചു കെട്ടിയിരിക്കുന്നു.ബ്രസീല്‍ ,അര്‍ജന്റീന ,ഇംഗ്ലണ്ട്,സ്പെയിന്‍ തുടങ്ങിയവരെല്ലാം ആ കൂട്ടത്തിലുണ്ട്.

വിവിധ രാജ്യങ്ങളുടെ പതാകകള്‍
ചെറിയ ചെറിയ കവലകളില്‍ എല്ലാം ,സായാഹ്നങ്ങളില്‍ ലോക കപ്പു ചര്‍ച്ചകള്‍ മാത്രം.
മലപ്പുറം പട്ടണത്തിനു അടുത്തുള്ള ഒരു ചെറുഗ്രാമത്തിലെ ചായക്കടയില്‍ വൈകുന്നേരം കയറിയ ഞാന്‍ അങ്ങിനെയുള്ള രസകരമായ ഒരു ചര്‍ച്ചക്ക് സാക്ഷിയായി.കടയുടമയായ ഖാദര്‍ ഒരു തീവ്ര ബ്രസീല്‍ അനുഭാവിയാണ്.കടയിലെ പതിവുകാരായ ഉസ്മാന്‍ ,ഷംസു ,കിരണ്‍ തുടങ്ങിയവര്‍ അര്‍ജന്റീനയുടെ കടുത്ത ആരാധകരും.പന്തയത്തിന്റെ ഇനമായിരുന്നു വിഷയം.തല മൊട്ടയടിക്കല്‍ ,ഒരു മാസത്തെ സൌജന്യ ഭക്ഷണം എന്നിവ എല്ലാം പന്തയ വിഭവങ്ങളായി രംഗത്തെത്തിയെങ്കിലും ,താരമായി മാറിയത് മൊബൈല്‍ ഫോണ്‍ തന്നെ.കയ്യാങ്കളി വരെ എത്തിയ ചര്‍ച്ചയില്‍ ,സമ്മാനമായി നോകിയ 5800 തീരുമാനിച്,അവര്‍ സൌഹൃദ പൂര്‍വ്വം പിരിഞ്ഞു.ലോക കപ്പിന്ശേഷമുള്ള ആഘോഷങ്ങളില്‍ പങ്കെടുക്കുവാന്‍ ഇരുകൂട്ടരുടെയും സ്നേഹപൂര്‍വമുള്ള ക്ഷണം എനിക്കും ലഭിച്ചു. ഇനി കാത്തിരിപ്പിന്റെ നാളുകള്‍ .

ഫുട്ബോളിനോട് അടങ്ങാത്ത അഭിനിവേശം,അഭിനന്ദിക്കപ്പെടെണ്ടത് തന്നെ.ആര്‍ക്കും ഈ നാട്ടുകാരുടെ അത്മാര്‍ത്ഥതയെ ചോദ്യം ചെയ്യാനാകില്ല.അതുകൊണ്ടാണല്ലോ രാജ്യത്തെ ഏറ്റവും വലിയ സെവന്‍സ് ടൂര്‍ണമെന്റും മലപ്പുറം ജില്ലയില്‍ തന്നെ സംഘടിക്കപ്പെടുന്നതും.
തിരികെ വരുന്ന വഴിയില്‍ , ഹൃദ്യമായ മറ്റൊരു കാഴ്ച എന്നെ കാത്തിരിക്കുന്നുണ്ടായിരുന്നു.ഒരു ലോക കപ്പിന്റെ മനോഹരമായ രൂപം തന്നെ ,വണ്ടുരിനു അടുത്തുള്ള ചെട്ടിയാറമ്മല്‍ ജംഗ് ഷനില്‍ നിര്‍മ്മിക്കപ്പെട്ടിരിക്കുന്നു. ഫുട് ബോള്‍ പ്രേമികളായ ഒരു സംഘം ചെറുപ്പക്കാരാണിതിനു പിന്നില്‍ .

ചെട്ടിയറമ്മലിലെ ലോകകപ്പ്

തെക്കന്‍ അമേരിക്കന്‍ രാജ്യങ്ങളോട് കിടപിടിക്കുന്ന ഫുട്ബോള്‍ വികാരം സിരകളിലോടുന്ന ഈ ജനതയ്ക്ക് ഇനി ഒരു മാസക്കാലം നിദ്ര ഒഴിഞ്ഞ രാവുകള്‍ . ഇത്രയും ഫുട്ബോള്‍ കമ്പക്കാര്‍ ഇന്ത്യയില്‍ ,ഗോവയും ബംഗാളും ഉള്‍പ്പടെ,മറ്റെവിടെയെങ്ങിലും ഉണ്ടോ എന്ന് തന്നെ സംശയം.ലോക കപ്പിന്റെ അലയടികള്‍ മുഴങ്ങുന്ന കൊച്ചു കേരളത്തിലെ ,ഈ മലപ്പുറം ജില്ല ലോക ഫുട്ബോളിന്റെ തന്നെ ശ്രദ്ധാ കേന്ദ്രമാകുന്ന കാലം വിദൂരമല്ല എന്ന് നമുക്ക് പ്രത്യാശിക്കാം.
പ്രത്യേകമായി മലബാറിലെയും,പൊതുവില്‍ കേരളത്തിലെയും എല്ലാ ഫുട്ബോള്‍ പ്രേമികള്‍ക്കും ലോക കപ്പ്‌ ആശംസകള്‍ .

പാലക്കാട് ജില്ല-ഷൊര്‍ണ്ണൂര്‍ കവളപ്പാറ കൊട്ടാരം

2010-05-08T10:24:00.000-07:00

അടുത്തയിടെ ഷൊര്‍ണൂര്‍ വഴി യാത്ര ചെയ്തപ്പോഴാണ് കവളപ്പാറ കൊട്ടാരത്തെ കുറിച്ച് ഓര്‍മ്മ വന്നത്.ഒന്ന് കണ്ടിട്ട് പോകാമെന്ന് തീരുമാനിച്ചു.പക്ഷെ ക്യാമറ കയ്യില്‍ കരുതിയിട്ടില്ല.മൊബൈല്‍ ക്യാമറയില്‍ കിട്ടുന്നതാകട്ടെ എന്ന് വിചാരിച്ചു കാര്‍ ആ വഴിയിലേക്ക് തിരിച്ചു.ടൌണില്‍ നിന്നും ഏകദേശം മൂന്നു കി മി പാലക്കാട് റോഡില്‍ യാത്ര ചെയ്‌താല്‍ കൊട്ടാരത്തിലെത്താം.
കൊല്ലിനും കൊലക്കും അധികാരമുണ്ടായിരുന്ന മൂപ്പില്‍ നായരുടെ ഉടമസ്ഥതിയിലുള്ള കവളപ്പാറ കൊട്ടാരത്തിന്റെ ഇപ്പോഴത്തെ അവസ്ഥ പരമ ദയനീയമാണ്.

പിന്‍ ഭാഗം

മുന്‍ വശത്തുനിന്നുമുള്ള ദൃശ്യം

96 ഗ്രാമങ്ങളുടെ അധിപനായിരുന്ന മൂപ്പില്‍ നായര്‍ക്കു അളവറ്റ വസ്തു വകകള്‍ തന്റെ അധീനതയിലുണ്ടായിരുന്നു.മണ്ണാര്‍ക്കാട് പ്രദേശമാകെ ഈ കുടുംബതിന്റെതായിരുന്നുവത്രേ.1960 -കളിലെ വ്യവഹാരങ്ങളില്‍ കുടുങ്ങി പഴയ കൊട്ടാരക്കെട്ടു ഇപ്പോള്‍ റിസീവര്‍ ഭരണത്തിലാണ്.ഏതാണ്ട് പൂര്‍ണ്ണമായും നശിക്കാറായ പ്രധാന എടുപ്പും,ഗതകാല സ്മരണകള്‍ പേറി നില്‍ക്കുന്ന വലിയ ഊട്ടുപുരയും ,തകര്‍ന്നു കിടക്കുന്ന സര്‍പ്പക്കാവും ആണ് ഇവിടെ അവശേഷിക്കുന്നവയില്‍ മുഖ്യം.

നാലുകെട്ട്

ഊട്ടുപുര

കുളപ്പുരയും കിടങ്ങും

വിശാലമായ മുന്‍ ഭാഗം

സര്‍പ്പക്കാവ്

ക്ഷേത്രം

തകര്‍ന്നു തുടങ്ങിയ നാലുകെട്ടും,കുളപ്പുര മാളികയും ഇതോടൊപ്പമുണ്ട്.വിശാലമായ പറമ്പും.ക്ഷേത്രം , വലിയ പരിക്കുകളില്ലാതെ നിലകൊള്ളുന്നു.കൊട്ടാരക്കെട്ടിന്റെ പുനരുദ്ധാരണത്തിനായി,സംസ്ഥാന പുരാവസ്തു വകുപ്പ് ചില പദ്ധതികള്‍ തയ്യാറാക്കി എന്ന് കേട്ടിരുന്നുവെങ്കിലും ,അവയൊന്നും ഇത് വരെ യാഥാര്‍ത്ഥ്യമായിട്ടില്ല.

ഉണ്ണിയപ്പം-ഒരു വയനാടന്‍ പെരുമ

2010-03-28T06:22:00.000-07:00

അടുത്തയിടെ വയനാട്ടിലൂടെ യാത്ര ചെയ്തപ്പോള്‍ ,മാനന്തവാടിക്കടുത്തുള്ള കാട്ടിക്കുളം എന്ന സ്ഥലം കഴിഞ്ഞ് തെറ്റ് റോഡ് എന്ന കൌതുകകരമായ പേരുള്ള ജംഗ്ഷന്‍ കാണാനിടയായി.

തെറ്റ് റോഡ് ജംഗ്ഷന്‍

റോഡുകള്‍ തിരുനെല്ലിക്കും,വീരാജ്പേട്ടിനും തിരിയുന്ന ആ ജംഗ്ഷനില്‍ സഞ്ചാരികള്‍ക്കു പലപ്പോഴും വഴി തെറ്റാറുള്ളത് കൊണ്ടാണത്രെ,തെറ്റ് റോഡ് എന്ന് പേര് വന്നത്!
വനമദ്ധ്യത്തിലുള്ള ആ ജംഗ്ഷനില്‍ സ്ഥിതി ചെയ്യുന്ന ചെറിയ ഒരു ചായക്കടയാണ് ജംഗിള്‍ വ്യു.

ജംഗിള്‍ വ്യു റ്റീ ഷോപ്പ്

തിരുനെല്ലി ക്ഷേത്രത്തിലേക്കുള്ള തീര്‍ത്ഥാടകര്‍ക്കായി, വളരെയേറേ വര്‍ഷങ്ങള്‍ക്കു മുന്‍പ്,തുടങ്ങിയതാണീ ചായക്കട.ഉണ്ണിയപ്പം,ഇഡ്ഡലി,സംഭാരം എന്നിവ മാത്രമാണ് ഇവിടെ ലഭിക്കുന്ന വിഭവങ്ങള്‍.അതില്‍ ഉണ്ണിയപ്പം ഏറെ പ്രശസ്തമാണ്.

കുതിര്‍ത്ത അരി ,മരത്തിന്റെ ഉരലില്‍ പൊടിക്കുന്നതോടെയാണ് ഉണ്ണിയപ്പത്തിന്റെ നിര്‍മ്മാണം ആരംഭിക്കുന്നത്.ഏറെ കടുപ്പമുള്ള പുളിമരത്തിന്റെ, നടുഭാഗം തുരന്നതാണീ ഉരല്‍.

പുളിമരത്തിന്റെ ഉരല്‍

അതില്‍ പ്ലാവിന്‍ തടി കൊണ്ടുള്ള ഉലക്ക യന്ത്ര സഹായത്താല്‍ പ്രവര്‍ത്തിപ്പിച്ച് ,അരി പൊടിക്കുന്നു.

യന്ത്രവല്‍ക്കൃത ഉലക്ക

ഈ അരിമാവ്, പഴവും രഹസ്യമായി സൂക്ഷിക്കുന്ന ചില ചേരുവകളും ചേര്‍ത്ത്,അപ്പക്കാരയില്‍ ഒഴിച്ച്, വിറകടുപ്പില്‍ ചുട്ടെടുക്കുന്നു.

തയ്യാറായി കഴിഞ്ഞ ഉണ്ണിയപ്പം ചൂടോടെ കുട്ടയിലേക്ക്.

നാവില്‍ വച്ചാല്‍ അലിഞ്ഞു പോകുന്നത്ര മൃദുലമായ ഉണ്ണിയപ്പം എത്ര കഴിച്ചാലും മതിവരില്ല.

കട ഉടമ കുട്ടേട്ടന്‍

അപ്പംവാങ്ങാനെത്തിയവരുടെ തിരക്ക്

ഇങ്ങനെ,ഒരു ദിവസം മൂവായിരത്തോളം അപ്പം ഉണ്ടാക്കുന്നുവെന്ന് കട ഉടമയായ കുട്ടേട്ടന്‍ പറഞ്ഞു.അദ്ദേഹത്തിന്റെ പുത്രന്മാരും ഇതില്‍ സഹായിക്കുന്നു.

ആകാശപാലം

2010-03-17T07:09:00.000-07:00

മലേഷ്യയുടെ ഭാഗമായ, ലങ്കാവിയിലെ ആകാശപാലം.

പത്ത് കേബിളുകളില്‍ തൂക്കിയിട്ടിരിക്കുന്ന,ഒരു സസ്പെന്‍ഡഡ്

കേബിള്‍ സ്ട്രേ ബ്രിഡ്ജാണിത്

സമുദ്രനിരപ്പില്‍ നിന്നും 2275 അടി ഉയരത്തിലാണീ പാലം.ഇവിടെ നിന്നും,തായ്ലന്റിലെ തരുതാവ് ദ്വീപിന്റേയും,

ആന്‍ഡമാന്‍ കടലിന്റെയും, കാഴ്ച ലഭിക്കും

ലങ്കാവിയിലെ കാഴ്ചകള്‍(മലേഷ്യ)

2010-03-06T01:15:00.000-08:00

കുലാലംപൂരിനു വടക്ക് പടിഞ്ഞാറായി,ആന്ടമാന്‍ സീയില്‍ സ്ഥിതി ചെയ്യുന്ന ഒരു ദ്വീപ സമൂഹമാണ് ലങ്കാവി.99 ദ്വീപുകളടങ്ങിയ സമൂഹത്തിലെ ഏറ്റവും വലിയ ദ്വീപാണ് 62000 പേര്‍ വസിക്കുന്ന ലങ്കാവി.അതി മനോഹരമായ ബീച്ചുകള്‍ ആണു ഇവിടത്തെ പ്രധാന ആകര്‍ഷണം.തെങ്ങും,നെല്ലും,കശുമാവും എല്ലാം നിറഞ്ഞു നില്ക്കുന്ന ഭൂ പ്രകൃതി കേരളത്തെ ഓര്‍മിപ്പിക്കുന്നു.

ചേതോഹരമായ ലങ്കാവിയിലെ കാഴ്ചകളില്‍ പ്രധാനപ്പെട്ടതാണ്,3200 ഏക്കറില്‍ വ്യാപിച്ചു കിടക്കുന്ന മാന്‍ ഗ്രോവ് (കണ്ടല്‍ കാട്)ഫോറസ്റ്റും , അതിലൂടെയുള്ള ബോട്ട് യാത്രയും.ലങ്കാവിയിലെ പ്രധാന പട്ടണമായ കുവാ നഗരത്തില്‍ നിന്നും 22 കിമി അകലെയുള്ള താന്‍ജംഗ് റൂ എന്ന സ്ഥലത്തെ ചെറിയ ജെട്ടിയില്‍ നിന്നുമാണ്,ഈ കാഴ്ചകള്‍ക്കായി,ബോട്ടില്‍ കയറേണ്ടത്.

താന്‍ജംഗ് റൂ ബോട്ട് ജെട്ടി

നോക്കെത്താ ദൂരത്തോളം പരന്നു കിടക്കുന്ന മാന്‍ ഗ്രോവ് ഫോറസ്റ്റ്,മനോഹരമായ ഒരു കാഴ്ചയാണ്.

2004ലെ സുനാമി ദുരന്തത്തില്‍ നിന്നുംലങ്കാവിയെ രക്ഷിച്ചത്‌ ഈ കണ്ടല്‍

‍കാടുകളാണെന്നു വിശ്വസിക്കപ്പെടുന്നു.

വിവിധ സസ്യ ,ജീവ ജാലങ്ങളുടെ ഒരു അമൂല്യ കലവറയാണ്,ഈ കണ്ടല്‍ കാടുകള്‍.

ഈ കാടുകളുടെ പ്രാധാന്യം തിരിച്ചറിഞ്ഞു, നന്നായി സംരക്ഷിച്ചിരിക്കുന്നു..

ഇവിടത്തെ മറ്റൊരു പ്രധാന വിനോദമാണ്‌ ഈഗിള്‍ ഫീഡിംഗ്.

ഈഗിള്‍ ഫീഡിംഗ്

ബോട്ടില്‍ നിന്നും വെള്ളത്തിലെക്കെറിയുന്ന ഇറച്ചിക്കഷണങ്ങള്‍,കാട്ടില്‍ നിന്നു ഞൊടിയിടയില്‍ പറന്നെത്തുന്ന കഴുകന്മാര്‍ കൊത്തിയെടുക്കുന്നത് കൌതുകകരമായ
കാഴ്ചയാണ്.
ലങ്കാവിയിലെ കാഴ്ചകള്‍ ഇവിടെ അവസാനിക്കുന്നില്ല.
ഇനിയും തുടരും.........

പെട്രോണാസ് ടവര്‍,മലേഷ്യ

2010-02-13T04:03:00.000-08:00

മലേഷ്യയിലെ പെട്രോനാസ് ടവര്‍ -രാത്രി കാല ദൃശ്യങ്ങള്‍

നാല്പത്തി ഒന്നാം നിലയിലെ പാലം

മറ്റൊരു ദൃശ്യം

2010-02-11T20:32:00.000-08:00

ലങ്ഗാവിയിലെ സൂര്യാസ്തമയം(മലേഷ്യ)